Паведаміла аб гэтым старшыня Таварыства польска-ўкраінскага прымірэння Караліна Раманоўская (Karolina Romanowska). Аднак у Інстытуце нацыянальнай памяці (ІНП) тлумачаць, што гэта адказ на прыватны запыт актывісткі, а запыты польскага афіцыйнага боку ад ІНП яшчэ чакаюць зялёнага святла.
Вясной 1943 году ў Вуглах былога Валынскага ваяводзтва сотня Украінскай паўстанчай арміі УПА забіла больш за 100 палякаў. Сярод іх члены сям'і Караліны Раманоўскай.
Прэс-сакратар ІНП Рафал Ляськевіч (Rafał Leśkiewicz) паведаміў Польскаму радыё, што эксгумацыі ў Вуглах будуць праводзіць адны толькі ўкраінцы.
— Украінскія ўлады паведамілі, што выдзелілі на гэта сродкі і разам з камунальным прадпрыемствам са Львова "Доля" будуць праводзіць пошукавыя дзеянні астанкаў у Вуглах. Гэта не праўда, як паведамляюць некаторыя СМІ, што Польшча атрымала згоду. Украінскі бок выдаў згоду сам сабе, каб мець магчымасць займацца гэтай справай.
Дагэтуль не быў задаволены запыт ІНП ад 19 лютага наконт пошуку пацярпелых у Вуглах. Чакаюць зацвярджэння яшчэ некалькі дзясяткаў зваротаў польскага інстытута.
Абмеркаванне далейшых пошукаў і эксгумацыі месцаў адбываецца ў межах Працоўнай групы па гістарычным дыялогу, створанай міністэрствамі культуры Польшчы і Украіны.
Першая эксгумацыя ахвяр г.зв. валынскай разні з удзелам польскага боку пасля амаль 8-гадовага мараторыю, уведзенага Кіевам, павінна пачацца 24 красавіка ў Пузніках на Падоллі.
Там у 1945 годзе УПА забіла каля 80 палякаў. Працу на месцы будзе каардынаваць польскі Фонд «Свабода і дэмакратыя» пры ўдзеле экспертаў Паморскага медыцынскага ўніверсітэта ў Шчэціне і Інстытута нацыянальнай памяці.
IAR/яс