У Ватыкане пачаўся перыяд «Sede Vacante», падчас якога адміністрацыйныя абавязкі ўзяў на сябе кардынал-камерленга, які адказвае, між іншым, за апячатванне папскіх апартаментаў і дакументаў, пачатак працэдур, неабходных для склікання канклава, а таксама знішчэнне пярсцёнка рыбака, інакш папскага пярсцёнка (атрыбут убору Рымскіх Папаў) і металічнай матрыцы для свінцовых пячатак.
Камерленга таксама кіруе Домам святой Марты, дзе спыняюцца кардыналы, якія ўдзельнічаюць у канклаве, і Сікстынскай капліцай, дзе праходзіць канклаў. Ён таксама бярэ пад кантроль папскую маёмасць і фінансы.
Пакуль не будзе абраны новы Папа Рымскі, улада ў Касцёле перайшла да Калегіі кардыналаў. Гэты орган можа прымаць рашэнні толькі па звычайных пытаннях, але не па доўгатэрміновых. Ён не можа, напрыклад, уносіць зменаў у дактрыну.
У канклаве, які адбудзецца ў пачатку траўня, бяруць удзел кардыналы-выбаршчыкі ва ўзросце да 80 гадоў. У цяперашні час у Калегіі кардыналаў 253 члены, з якіх 138 з'яўляюцца выбаршчыкамі.
Сярод іх польскія кардыналы Гжэгаж Рысь, Казімеж Ныч, Конрад Краеўскі, Станіслаў Рылка. У склад Калегіі кардыналаў уваходзіць таксама 86-гадовы кардынал Станіслаў Дзівіш. Аднак з-за ўзросту ён не будзе ўдзельнічаць у галасаванні.
IAR/аз