16 студзеня 2026 года прэзідэнт Польшчы Караль Наўроцкі сустрэўся з польскай алімпійскай зборнай падчас традыцыйнай навагодняй сустрэчы, якая адбылася ў Алімпійскім цэнтры ў Варшаве. Мерапрыемства сабрала спартоўцаў, трэнераў і прадстаўнікоў алімпійскага руху.
Выступаючы перад удзельнікамі сустрэчы, кіраўнік польскай дзяржавы падкрэсліў ролю спорту ў фармаванні нацыянальнай тоеснасці і выказаў удзячнасць спартоўцам за годнае прадстаўленне краіны за мяжой:
«Ад імя нашай нацыянальнай супольнасці магу сказаць, што палякі ганарацца сваімі спартоўцамі і тымі, хто вядзе нашых спартоўцаў да вялікіх поспехаў. Думаю, што спорт вучыць прыхільнасці да таго, што для нас найважнейшае: да нашай нацыянальнай ідэнтычнасці, да бела-чырвонага сцяга, да нашага прыгожага, цудоўнага гімна. За гэта я таксама хацеў падзякаваць усёй алімпійскай сям’і і ўсім спартоўцам, бо вы сапраўды з’яўляецеся пасламі Рэспублікі Польшча на палях, стадыёнах і на ўсіх спартыўных арэнах», — заявіў польскі лідар.
Зімовыя Алімпійскія гульні пачнуцца 6 лютага ў Італіі — у Мілане і Корціне-д’Ампецца. Чакаецца, што Польшчу прадставяць 56 спартоўцаў, але канчатковы склад каманды будзе вызначаны пасля завяршэння кваліфікацыйных спаборніцтваў.
iar/эж