Польская радыёстанцыя RMF FM паведаміла ў сераду, што спецслужбы Польшчы распрацавалі шпіёнскую сетку, якая вяла ў Польшчы дзейнасць у карысць Расіі. У эфіры станцыі адзначылі, што група магла весці падрыхтоўку да розных дыверсіяў, яе члены сачылі за працай польскай чыгункі.
У чацвер, 16 сакавіка, раніцай міністр унутраных спраў і адміністрацыі Марыюш Каміньскі паведаміў на спецыяльна скліканай прэс-канферэнцыі, што Агенцтва ўнутранай бяспекі затрымала дзевяць чалавек, падазраваных у супрацы з расійскай выведкай. Міністр Каміньскі сказаў, што падазраваныя займаліся ў Польшчы шпіянажам і дыверсіямі.
- Падазраваныя вялі разведдзейнасць супраць Польшчы, а таксама рыхтавалі акты дыверсіі па даручэнні расійскай разведкі. Затрыманыя – гэта іншаземцы з-за нашай усходняй мяжы. Шэсць з іх былі арыштаваныя паводле судовых ордараў на арышт. Пракуратура прадставіла ім абвінавачанні ў шпіёнстве, а таксама ва ўдзеле ў арганізаванай злачыннай групоўцы. У адносінах трох чалавек, якія былі затрыманыя ўчора, працягваюцца следчыя дзеянні пракуратуры.
Па словах Марыюша Каміньскага, затрыманыя шпіёны цікавіліся пастаўкай грузаў з дапамогай з Польшчы ва Украіну, збіралі адпаведную інфармацыю, а таксама рыхтавалі акты дыверсіі.
- Супрацоўнікі Агенцтва ўнутранай бяспекі затрымалі відэакамеры, электронную тэхніку, а таксама датчыкі, якія дыверсанты намерваліся прычапіць на аўтамабілі, у якіх быў груз з дапамогай для Украіны. Згодна з інфармацыяй, якую ўдалося сабраць агенцтву, стала вядома, што гэтая група таксама атрымлівала задачы па прасоўванні прапаганды, якая павінна была пагоршыць польска-украінскія адносіны, узбудзіць сярод жыхароў Польшчы варожае стаўленне ў адносінах Паўночна-атлантычнага пакту, а таксама крытыкавалі палітыку ўраду Польшчы адносна Украіны.
У распараджэнні Агенцтва ўнутранай бяспекі ёсць доказы, што падазраваныя рэгулярна атрымлівалі аплату за сваю дзейнасць ад расійскіх спецслужбаў. Міністр Марыюш Каміньскі дадаў, што справа дынамічная, яна можа атрымаць свой працяг.
У сваю чаргу віцэ-прэм'ер, міністр нацыянальнай абароны Марыюш Блашчак сказаў у эфіры Першай праграмы Польскага радыё, што, як у кожнай краіне, у Польшчы дзейнічаюць розныя шпіёнскія групы. Яны збіраюць інфармацыю, якую могуць перадаваць іншым дзяржавам. Асабліва гэта датычыць Расіі і Беларусі. Гэтыя краіны, паводле афіцыйнай версіі беларускай і расійскай прапаганды, лічаць Польшчу варожай дзяржавай і баяцца яе салідарнасці з Украінай. Міністр нагадаў, што адна з гэтых дзяржаў – Расія – пайшла вайной на Украіну, а супраць Польшчы была здзейсненая гібрыдная атака з тэрыторыі Беларусі.
– Мы жывем у часы, калі Расія вырашыла адбудаваць сваю імперыю. Гэтая імперыя заўсёды была небяспечная для Польшчы, незалежна ад таго, ці яна была белай, чырвонай ці цяпер – пуцінскай. Я яшчэ раз вярнуся да факту атакі на Польшчу пры дапамозе мігрантаў з тэрыторыі Беларусі, калі рэжым Лукашэнкі прывозіў мігрантаў з Блізкага Усходу. Я не сумняюся, што план гэтай атакі быў распісаны ў Крамлі. Задача была ў тым, каб дэстабілізаваць сітуацыю ў нашай краіне. Дарэчы, трэба згадаць безадказныя паводзіны некаторых палітыкаў нашай апазіцыі, якія патрабавалі адкрыць межы нашай краіны. Калі б сапраўды былі адкрытыя межы, нашай дзяржаве пагражала б дэстабілізацыя.
Блашчак падкрэсліў, што затрыманне шпіёнаў – гэта вялікі поспех супрацоўнікаў Агенцтва ўнутранай бяспекі. І, несумненна, доказ таго, што польскія службы вельмі эфектыўна працуюць, каб абараніць бяспеку дзяржавы – дадаў ён.
Службы, якія сочаць за бяспекай Польшчы, надаюць асаблівую ўвагу дзейнасці стратэгічна важных чыгуначных маршрутаў і ахове ключавых абʼектаў крытычнай інфраструктуры. Ахова была ўзмоцнена. На пытанне, ці затрыманыя, а таксама іх калегі, якіх не ўдалося затрымаць, могуць прадстаўляць сурʼёзную пагрозу для крытычнай інфраструктуры, Марыюш Блашкак адказаў станоўча.
- Канешне ж, так. Гэта была шпіёнская група, група людзей, якая збірала інфармацыю ў карысць тых, хто напаў на Украіну, хто здзяйсняе ваенныя злачынствы. Расія здзяйсняе ваенныя злачынствы ва Украіне. Так што пагроза была рэальнай.
Раніцай у чацвер на беларускім тэлеграм-канале, звязаным з сілавымі структурамі, з’явіліся ўжо імёны часткі затрыманых. Паводле канала, сярод іх трое беларусаў. Гэта Мікалай Маскаленка, 1971 г. н.; Уладзіслаў Пасміцюха, 1994 г. н.; Марыя Мядзведзева, 2004 г. н. Акрамя таго, публікуецца відэа са сваякамі затрыманых, якія кажуць, што іх родныя ні ў чым не вінаватыя.
IAR/Наша Ніва/нг