Такое рашэнне палегчыць палякам паездкі і абароніць іх ад дадатковых выдаткаў, паведаміў PAP намеснік кіраўніка Міністэрства ўнутраных спраў і адміністрацыі Барташ Градэцкі (Bartosz Grodecki).
Віцэ-міністр Градэцкі падкрэсліў, што кожны грамадзянін Польшчы зможа падаць заяўку на хуткі часовы пашпарт у варшаўскім аэрапорце імя Шапэна.
«Гэта экстранае рашэнне. Гэта дазволіць праехаць чалавеку, які згубіў пашпарт, не ведаў, што тэрмін яго дзеяння скончыўся, або проста забыўся ўзяць яго дома, або не забраў дакумент у пашпартным стале. Важна, што гэта не з'яўляецца чарговым пунктам выдачы пашпартоў, якія працуюць у абласных упраўленнях», – адзначыў ён.
Намеснік кіраўніка МУС дадаў, што на такі пашпарт змогуць прэтэндаваць і асобы з падвойным грамадзянствам, якія прыехалі ў Польшчу. «Здараецца, што яны прыязджаюць з пашпартам іншай краіны, хоць, згодна з правіламі, грамадзянін Польшчы павінен прадʼявіць польскім уладам дакумент, які сведчыць асобу. Цяпер такія людзі змогуць хутка атрымаць часовы дакумент у аэрапорце», – сказаў ён.
Кошт паслугі будзе 30 злотых.
«Хуткі часовы пашпарт не толькі палегчыць палякам падарожжы, але і абароніць іх ад дадатковых выдаткаў, звязаных з адкладаннем паездкі і зменай рэйсу», – заявіў намеснік міністра.
Для стварэння такога пункта ўнесены змены ў нормы Закона аб пашпартных дакументах. Адной з паправак у пералік абставінаў, пры якіх можа быць аформлены часовы пашпарт, былі дададзены выключныя сітуацыі.
Асноўнай падставай для афармлення хуткага часовага пашпарта будзе адсутнасць дзейнага пашпарта, нягледзячы на запланаваны выезд. Дакумент будзе выдадзены на падставе авіябілета на перыяд паездкі ў адпаведнасці з патрабаваннямі дадзенай краіны. Паводле слоў намесніка міністра, звычайна гэта будзе ад трох да шасці месяцаў. Максімальны тэрмін дзеяння – адзін год.
Увесь працэс атрымання дакумента зойме каля 10-15 хвілін, уключаючы фатаграфаванне на месцы. Ідэнтыфікаваць асобу змогуць па дакуменце, які сведчыць асобу. На афармленне пашпарта непаўналетняму павінны быць згодныя абодва бацькі. Калі адзін з бацькоў па розных прычынах не зможа дабрацца да аэрапорта, згода павінна быць аформлена праз сістэму E-PUAP або традыцыйна ў пісьмовай форме з подпісам, завераным у канторы або натарыусам.
Спачатку пункт хуткага атрымання часовага пашпарта будзе працаваць з панядзелка па пятніцу з 8.00 да 20.00. Часовы пункт хуткай выдачы пашпартоў, які працуе з чацвярга, знаходзіцца на ўзроўні вылету ў грамадскай зоне тэрмінала А аэрапорта імя Шапэна ў Варшаве.
PAP / вх
