Амаль 80 гуманітарных арганізацыяў звярнуліся да міжнароднай супольнасці з просьбай вылучыць амаль 400 мільёнаў долараў на падтрымку ўкраінскіх уцекачоў у Польшчы. Гэта сродкі на бягучы і наступны год, якія неабходныя перш за ўсё недзяржаўным арганізацыям.
У Польшчы па-ранейшаму знаходзіцца каля мільёна ўцекачоў з Украіны. Падрабязнасці іх патрэб апісаны ў Рэгіянальным плане дзеянняў для бежанцаў - дакуменце Упраўлення Вярхоўнага камісара Арганізацыі Аб'яднаных Нацый па справах бежанцаў (УВКБ).
Яго прадстаўнік у Польшчы Кевін Дж. Ален нагадвае, што больш за 80 працэнтаў украінскіх бежанцаў у Польшчы - гэта жанчыны, дзеці і старэйшыя людзі. Таму асноўнымі сферамі дапамогі з'яўляюцца абарона, эканамічная інтэграцыя, ахова здароўя, жыллё і адукацыя.
«Асаблівай увагі патрабуе сітуацыя з падлеткамі, маладымі людзьмі, якія часам знаходзяцца пад пагрозай выпадзення з сістэмы адукацыі. Гэта ключавая праца, таму што адукацыя - гэта сапраўды інвестыцыя ў чалавечы капітал для будучыні. Мы не хочам страчанага пакалення ўкраінскіх дзяцей», - сказаў Кевін Дж. Ален.
Цяжар падтрымкі бежанцаў з Украіны таксама нясуць цэнтральныя і мясцовыя ўлады. Яны супрацоўнічаюць з мясцовымі няўрадавымі арганізацыямі, якія займаюцца дзейнасцю ў крызісных сітуацыях. Урад падтрымае гэтыя ініцыятывы.
«У нас ёсць новая праграма: «Сіла малых супольнасцей». Не толькі падчас украінскага крызісу, але і падчас пандэміі і паводкі грамадзянская супольнасць адыграла надзвычай важную ролю. (…) Мы ахвяруем 70 мільёнаў злотых на гэты год», - заявіла міністр грамадзянскай супольнасці Адрыяна Пароўска.
Паводле звестак Упраўлення Вярхоўнага камісара Арганізацыі Аб'яднаных Нацый па справах бежанцаў (УВКБ), у мінулым годзе больш за 144 тысяч бежанцаў у Польшчы атрымалі экстранную дапамогу, такую як грашовыя сродкі, жыллёвую падтрымку, харчаванне або прадметы першай дапамогі.
Больш за 70 тысяч украінцаў скарысталіся ініцыятывамі, уключаючы адкрыццё ўласнага бізнесу, працаўладкаванне, вывучэнне мовы або атрыманне сертыфіката навыкаў. Прычым амаль 100 тысяч дзеці ўдзельнічалі ў праграмах нефармальнай адукацыі, у тым ліку ў моўных занятках.
IAR/аз