У навучальным цэнтры ва Ульянаўску пачаўся масавы пратэст мабілізаваных жыхароў Чувашыі, якім не выплацілі 195 тысяч расійскіх рублёў (каля 8 тысяч беларускіх).
Зварот «да грамадзян Расіі» апублікавала «Сердитая Чувашия».
«Мы, рызыкуючы ўласным жыццём, ідзем на верную смерць для вашай бяспекі і мірнага жыцця! Наша дзяржава адмаўляецца выплаціць нам грашовыя сродкі ў памеры 195 тысяч рублёў, якія нам абяцаў Уладзімір Пуцін! Дзеля чаго тады нам ісці ваяваць за гэтую дзяржаву, пакінуўшы свае сем'і без падтрымкі?!»,— заявілі вайскоўцы.
Мабілізаваныя адмаўляюцца ад удзелу ў вайне і «будуць дамагацца справядлівасці», пакуль ім не выплацяць абяцаныя сумы.
У навучальны цэнтр ва Ульянаўску сцягваюцца АМАП і Расгвардыя для падаўлення бунту сярод мабілізаваных з Чувашыі.
На відэа, апублікаваным у тэлеграме, вайскоўцы выказваюць прэтэнзіі і заяўляюць, што іх падманулі з выплатамі. Акрамя таго, яны спрабуюць высветліць, дзе знаходзіцца іх камандзір палка.
Адзін з пратэстоўцаў заявіў, што прыехаў у родны горад з Масквы, каб удзельнічаць у вайне.
nashaniva.com / вх