Кіраўнік Паўночнай Карэі Кім Чэн Ын заявіў міністру замежных спраў Расіі Сяргею Лаўрову, які знаходзіцца з візітам у краіне, што Пхеньян гатовы «безумоўна падтрымаць» дзеянні Масквы адносна канфлікту з Украінай, паведаміла паўночнакарэйскае інфармацыйнае агенцтва KCNA. Дакладныя ўмовы пагаднення застаюцца незразумелымі.
«Кім Чэн Ын пацвердзіў, што КНДР гатовая безумоўна падтрымліваць і заахвочваць усе меры, якія прымае расійскае кіраўніцтва для ліквідацыі карэнных прычын украінскага крызісу», – напісала паўночнакарэйскае агенцтва.
На гэтым тыдні ўкраінская ваенная разведка паведаміла, што 40 працэнтаў расійскіх боепрыпасаў паступае з Паўночнай Карэі. У Расію таксама пастаўляецца высакаякасная артылерыя і балістычная зброя. Чакаецца таксама перакідванне салдат.
Раней Лаўроў сустрэўся з міністрам замежных спраў Паўночнай Карэі Чонсанам. Пасля сустрэчы ён абвінаваціў ЗША, Паўднёвую Карэю і Японію ў назапашванні ваеннага патэнцыялу вакол КНДР. Чонсан паўтарыў, што Паўночная Карэя «безумоўна» падтрымлівае вайну Расіі супраць Украіны. Ён ахарактарызаваў сувязі паміж Масквой і Пхеньянам як «непераможны саюз».
Супрацоўніцтва Расіі з Паўночнай Карэяй значна ўмацавалася за апошнія два гады. Пхеньян адправіў больш за 10 000 вайскоўцаў і зброю для падтрымкі ваенных аперацый Масквы, паведаміла агенцтва Reuters.
Лаўроў падзякаваў «гераічным» паўночнакарэйскім салдатам за дапамогу ў адбіцці нападу ўкраінскіх войскаў у Курскай вобласці, куды яны ўварваліся ў жніўні 2024 года, паведаміла Міністэрства замежных спраў Расіі.
Інфармацыйнае агенцтва ТАСС паведаміла, што нядаўна пабудаваны прыморскі курорт Вонсан можа павялічыць «расійскі турызм» у Паўночнай Карэі. Яно спасылалася на планы аднаўлення прамога чыгуначнага паведамлення з Масквы ў Пхеньян і праект будаўніцтва моста праз раку Цюмень, якая з'яўляецца часткай мяжы паміж Паўночнай Карэяй, Кітаем і Расіяй.
Беларусь пры падтрымцы Расіі запрасіла Паўночную Карэю прыняць удзел у трэцяй канферэнцыі па бяспецы еўразійскай архітэктуры, і карэйскі бок разглядае такую магчымасць, таксама паведаміў Лаўроў.
У чэрвені 2024 года ў Пхеньяне Уладзімір Пуцін і Кім Чэн Ын падпісалі «Дагавор аб усебаковым стратэгічным партнёрстве паміж Карэйскай Народна-Дэмакратычнай Рэспублікай і Расійскай Федэрацыяй». Кім ратыфікаваў дагавор 11 лістапада 2024 года, пасля таго, як Пуцін ратыфікаваў яго напярэдадні. Дагавор уключае абавязацельства бакоў аказваць узаемную ваенную дапамогу ў выпадку пагрозы іх суверэнітэту.
Пасля візіту ў Паўночную Карэю Сяргей Лаўроў плануе адправіцца ў Кітай для ўдзелу ў сустрэчы Шанхайскай арганізацыі супрацоўніцтва 14-15 ліпеня.
PAP/IAR