Раніцай у аўторак пачаліся работы па выдаленні помніка савецкаму танку Т-34 з горада Нарва ва ўсходняй частцы Эстоніі, пераважна населенай рускамоўным насельніцтвам, паведамляюць эстонскія СМІ.
«Улічваючы тэмпы росту напружанасці вакол помнікаў Нарвы, мы павінны дзейнічаць хутка, каб забяспечыць грамадскі парадак і ўнутраную бяспеку. Урад вырашыў прыбраць ваенныя мемарыялы былога рэжыму, каб прадухіліць мабілізацыю варожасці ў грамадстве і залячыць старыя раны», – заявіла прэм'ер-міністр Эстоніі Кая Калас.
Як паведамляе партал err, у горад прыцягнутыя значныя сілы паліцыі і забаронены доступ да месца дэмантажу помніка.
На мінулым тыдні мясцовыя ўлады заявілі, што за лёс помніка адказвае мясцовая адміністрацыя. Аднак прэмʼер-міністр Калас падкрэсліла, што пасля нападу Расіі на Украіну «пытанне ваенных мемарыялаў СССР у публічнай прасторы Эстоніі перастала быць лакальнай справай».
Партал err паведамляе, што ў Эстоніі знаходзіцца ад 200 да 400 камуністычных помнікаў. Калас адзначыла, што абʼекты на прыватных участках могуць быць дэмантаваныя самімі ўласнікамі.
У 2007 годзе ў сталіцы Эстоніі ўспыхнулі пратэсты з-за пераносу з цэнтра горада савецкага помніка Вызваліцелям Таліна (Бронзавы салдат), нагадвае эстонскі сайт.
ав