Міністэрства ўнутраных спраў Іспаніі зафіксавала рост на 66% колькасці людзей, якія нелегальна ўехалі ў краіну за сем месяцаў 2024 года ў параўнанні з аналагічным перыядам мінулага года.
З пачатку года па 15 жніўня 31 155 чалавек нелегальна перасеклі сухапутную і марскую мяжу і ўехалі ў Іспанію, паведаміла міністэрства ўнутраных спраў, якое цытуе ў суботу штодзённая «El Pais». Нягледзячы на рост нелегальнай іміграцыі на 66%, назіраецца бачнае запаволенне прытоку ў параўнанні з першымі месяцамі года, адзначае штодзённік.
Большасць нелегальных імігрантаў, прыкладна 70 працэнтаў, прыбываюць у Іспанію праз Канарскія астравы; у параўнанні з першымі месяцамі мінулага года іх колькасць павялічылася на 126%.
«Марока ўсё больш кантралюе вылеты, у той час як праблема цяпер ляжыць паўднёвей, у Маўрытаніі», піша El Pais. Штодзёнка нагадвае, што прэм'ер-міністр Іспаніі Пэдра Санчэс напрыканцы месяца мае наведаць гэтую афрыканскую краіну, каб узмацніць супрацоўніцтва паміж дзвюма дзяржавамі.
Маўрытанія і яе прыбярэжныя воды ўсё часцей становяцца часткай атлантычнага маршрута для жыхароў рэгіёну Цэнтральнага Сахеля і Гвінейскага заліва, якія жадаюць патрапіць на Канарскія астравы без віз. Гэта адзін з самых небяспечных маршрутаў мігрантаў у свеце. Трагічныя ўтапленні адбываюцца там рэгулярна.
Паводле дадзеных арганізацыі Caminando Fronteras, якая абараняе правы мігрантаў, са студзеня па травень гэтага года на Канарскім маршруце патанулі прыкладна 5000 чалавек.
Акрамя значнага росту імігрантаў з Маўрытаніі (больш за 13 000 чалавек да сярэдзіны жніўня, 6 000 у мінулым годзе), крыніцы ў паліцыі таксама адзначаюць значны рост мігрантаў з Алжыра (15%), у першую чаргу на Балеарскія астравы.
Іспанія ў цяперашні час з'яўляецца адзінай краінай Міжземнамор'я, дзе расце колькасць нелегальных перасячэнняў мяжы, сведчаць дадзеныя Міжнароднай арганізацыі па міграцыі (МАМ).
PAP/юл
