Пясочнае цеста
200 г пшанічнай мукі
50 г крухмалу
200 г ахалоджанага сметанковага масла
30 г цукру
дробка солі
1/2 чайнай лыжкі разрыхляльніка
4 жаўткі (яечны бялок захоўваем для безэ)
Прасейце муку ў міску, дадайце дробна нарэзанае халоднае сметанковае масла, цукар, соль і разрыхляльнік. Змяшайце і разамніце пальцамі сметанковае масла і муку, пакуль не ўтворыцца дробная крошка. Дадайце жаўткі і хутка замясіце цеста.
Раскачайце і перанясіце ў форму для выпечкі, папярэдне змазаную сметанковым маслам і высланую пергаментам для выпечкі. Пастаўце ў халадзільнік, пакуль духоўка награваецца да 170 градусаў С. Прабіце дно відэльцам і пастаўце ў духоўку. Выпякаем 20 хвілін.
Начынка
600 г рэвеня (рабарбара)
3 сталовыя лыжкі крухмалу
1/2 чайнай лыжкі карыцы
100 г варэння (найлепш малінавага)
3 сталовыя лыжкі міндальных шматкоў
Прамыйце рабарбар, асушыце, сцябло нарэжце на кавалачкі памерам каля 1 см, дадайце крухмал, карыцу і змяшайце. Дадайце варэнне.
Безэ
4 бялкі
200 г цукру
1 сталовая лыжка крухмалу
Бялкі ўзбіце да густой пены, паступова дадаючы цукар. Увесь час узбівайце на высокай хуткасці міксера, пакуль пена не стане густой і не пачне блішчаць. Затым дадайце крухмал і змешвайце яшчэ паўхвіліны.
Пакладзіце ў выпечанае цеста рабарбар, зверху безэ, пасыпце міндальнымі шматкамі і пастаўце ў духоўку. Выпякайце на працягу 20 хвілін пры тэмпературы 170 градусаў С, затым скіньце тэмпературу да 60 градусаў і ўключыце канвекцыю, каб такім чынам высушыць безэ. Духоўка павінна працаваць з канвекцыяй 15 хвілін.
Смачна есці!
Падрабязней пра тое, як зрабіць страву, раскажуць Кацярына Адамская і Валеры Саўко.
слухайце аўдыёфайл