Партал Goniec.pl атрымаў доступ да паказанняў ахвяры, над якой здзекавалася Дагмара Казьмерска. 24-гадовая дзяўчына распавяла, як яна працавала ў публічным доме Казьмерскай.
Дагмара Казьмерска стала зоркай праграм «Каралевы жыцця», рэаліці-шоў «Дагмара шукае мужа» і «Танцы з зоркамі» прыватных тэлеканалаў.
Партал Оnet.pl паразважаў на тэму прыстойнасці і этыкі на тэлебачанні.
— Нам нудна. А калі нам нудна, нам не патрэбны маралізатарскія пропаведзі, мы не хочам бачыць светлавыя фігуры. Нам цікава тое, што з'яўляецца цёмным, злым, подлым і агідным. Праблема ў тым, што раней мы гэтага саромеліся, а сёння хвалімся, — тлумачыць сацыёлаг прафесар Магдалена Сьрода.
— Прапаганда паталогіі і глупства на тэлебачанні — вынаходніцтва не апошняга часу. Натуральны электарат шклянога экрана вымірае. Моладзь пайшла ў інтэрнэт. Тэлеканалы змагаюцца за выжыванне, таму паказваць героямі злачынцаў, зладзеяў, махляроў — не праблема, — падкрэслівае абураная гэтым фактам журналістка Караліна Корвін-Пятроўская.
Сацыёлаг Магдалена Сьрода ўспамінае, што праграма «Ідал» стала прарыўным момантам на тэлебачанні. У першым выпуску шоў член журы, вядомы ў Польшчы журналіст Куба Ваявудскі першым парушыў нормы прыстойнасці на публіцы.
Сацыёлаг прыгадала, што малады чалавек, які спяваў перад экспертамі, замест прафесійнага меркавання пачуў ад Ваявудзкага: «ты ідыёт», «ты нам надакучыў».
— Тэлебачанне даўно стала сродкам масавай інфармацыі, дзе не дзейнічаюць ніякія маральныя нормы, таму што яны проста нудныя ў камерцыйным сэнсе. На тэлебачанні — абраза стала таварам, які прадаецца, — падкрэслівае прафесар Сьрода.
Мы любім назіраць за паталагічнымі паводзінамі
Сацыёлаг таксама адзначае, што мы любім назіраць за паталагічнымі паводзінамі, бо такім чынам можам павысіць сваю самаацэнку.
— Нам цікава ўсё, што з'яўляецца цёмным, злым, подлым і агідным. Праблема ў тым, што раней мы гэтага саромеліся, а сёння хвалімся, — кажа навуковец.
— Усе гэтыя праграмы нагадваюць падглядванне за суседзямі праз замок, пакуль яны сварацца. Мы вяртаемся дадому і радуемся, што мы якраз не сварымся. Сёння сенсацыя патрэбная СМІ, каб прывабіць гледачоў, але гэта прыводзіць да дэзарыентацыі чалавека, — мяркуе прафесар Магдалена Сьрода.
яс