ІНГРЭДЫЕНТЫ
0,5 шклянкі рысу
1 шклянка 30% вяршкоў
ванільны экстракт або стручок ванілі
5 чайных лыжак жэлаціну
1,5 шклянкі малака
3 сталовыя лыжкі цукру
2 сталовыя лыжкі цэдры лімона
любое варэнне
Зварыце рыс у малацэ з двума сталовымі лыжкамі цукру, лімоннай цэдрай і ваніллю. Сачыце за ім і пастаянна памешвайце, каб ён не прыгарэў. Калі амаль усё малако ўсмокчацца, накрыйце, выключыце агонь і пакіньце астываць.
Узбіце вяршкі са сталовай лыжкай цукру. Растварыце жэлацін у як мага меншай колькасці гарачай вады. Пасля гэтага дадайце сталовую лыжку ўзбітых вяршкоў, перамяшайце і ўліце рэшту вяршкоў. Добра перамяшайце.
Змяшайце рыс, які астыў, з вяршкова–жэлацінавай сумессю.
Наліце слой рысу ў невялікую пасудзіну, затым дадайце чайную лыжку варэння (яно павінна быць дастаткова густым, каб не расцякалася), затым накрыйце яшчэ адным пластом рысу. Пастаўце ў халадзільнік на некалькі гадзін. Пудынг можна падаваць у формах альбо дастаць з формы і падаваць асобна.
Смачна есці!
Падрабязней пра тое, як прыгатаваць страву, раскажуць Кацярына Адамская і Валеры Саўко.
здымак ілюстрацыйны
слухайце аўдыёфайл