У Варшаве адбыўся вечар памяці Юрыя Туронка

26 красавіка споўніцца 95 гадоў з дня нараджэння Юрыя Туронка, вядомага польскага гісторыка беларускага паходжання.

Афіша вечара памяці Юрыя Туронка ў варшаўскай Вітрыне “Усходняга дома” (Witryna Domu Wschodniego).

Foto: Witryna Domu Wschodniego

26 красавіка споўніцца 95 гадоў з дня нараджэння Юрыя Туронка, вядомага польскага гісторыка беларускага паходжання, грамадскага дзеяча. У сувязі з гэтым у варшаўскай Вітрыне “Усходняга дома” (Witryna Domu Wschodniego) 23 красавіка адбыўся вечар памяці выдатнага вучонага.

Вечар памяці Юрыя Туронка ў Варшаве адбыўся дзякуючы ініцыятыве вядомага польскага гісторыка беларускага паходжання Юрыя Грыбоўскага. На мерапрыемства сабраліся многія польскія і беларускія вучоныя, а таксама чытачы прац Туронка і, вядома, сваякі — удава Зінаіда Туронак, дачка Наталля Туронак.

Вядомы вучоны пайшоў з жыцця пяць год таму... У сваіх выступленнях прысутныя падкрэслівалі той уплыў, які аказалі на іх працы даследчыка, а таксама асабістыя размовы з ім.

Паводле ўспамінаў Юрыя Грыбоўскага, яго знаёмства з Юрыем Туронкам адбылося нечакана проста — у кватэры Туронка на вул. Тамка ў Варшаве.

Сустрэча ў памяць пра Юрыя Туронка стала добрай нагодай успомніць добрым словам вядомага даследчыка, падзяліцца ўспамінамі пра яго і як пра актыўнага дзеяча беларускай нацыянальнай супольнасці ў Польшчы, і як пра чалавека. Асабліва цікавымі былі расказы ўдавы вучонага Зінаіды Туронак, у прыватнасці, пра знаёмства з будучым мужам у 1960 г. у Супраслі.

Варшава, 23 красавіка 2024 г. Вечар памяці Юрыя Туронка. Злева направа: 2 -- Наталля Туронак, 3 -- Віктар Корбут, 4 -- Зінаіда Туронак, 5 -- Алена Глагоўская, 7 -- Юры Грыбоўскі, 8 -- Мажэна Гжыбоўская.

Адна з тых, хто добра знаў Юрыя Туронка і пастаянна з ім супрацоўнічаў, — вядомая даследчыца Алена Глагоўская. Яна падкрэслівае незвычайную эрудыцыю сп. Туронка — выдатнага знаўца беларускай гісторыі першай паловы ХХ ст.

Юры Грыбоўскі пазней пазнаёміў з Юрыем Туронкам многіх іншых гісторыкаў. 7 лістапада 2016 года і мне дзякуючы сп. Грыбоўскаму пашчасціла пазнаёміцца з Юрыем Туронкам. На памяць засталася яго кніга Białoruś pod okupacją niemiecką, выдадзеная ў 1989 годзе, — з аўтографам аўтара.

Віктар Корбут

Слухайце аўдыё