Старшыня Еўрапейскай камісіі запэўніла Украіну ў падтрымцы незалежна ад глабальных падзей.
— Мы ўсе хочам, каб гэты жах і кровапраліцце скончыліся. Ніхто не жадае міру больш, чым украінскі народ. Але вайна павінна скончыцца такім чынам, каб не пасеяць насенне магчымага будучага канфлікту. Аднак я магу запэўніць вас, што мы будзем выконваць свае абавязацельствы, бо гаворка ідзе не толькі пра наш аўтарытэт але, што больш важна, пра нашую бяспеку, — падкрэсліла Урсула фон дэр Ляен падчас штогадовай канферэнцыі амбасадараў ЕС.
Такім чынам яна пракаментавала занепакоенасць тым, што пачатак узброенага канфлікту на Блізкім Усходзе адцягне ўвагу ад вайны, якую Расія развязала ва Украіне.
Старшыня Камісіі запэўніла, што ЕС знойдзе спосаб, каб выдзеліць Украіне крэдыт у памеры 90 мільярдаў еўра цягам наступных двух гадоў. Нагадаем, перавод сродкаў блакуе Венгрыя, якая патрабуе аднаўлення транзіту расійскай нафты праз Украіну па трубаправодзе «Дружба».
Каментуючы гэтае пытанне, Урсула фон дэр Ляен прапанавала змяніць сістэму прыняцця рашэнняў у знешняй палітыцы ЕС. Гэта азначала б адыход ад адзінагалоснасці.
IAR/аз