Гэта найбуйнейшы фестываль беларускіх бардаў у Еўропе і ў свеце. Атмасфера мерапрыемства выяўляе акустычнае гучанне рока, фольк-рока і блюза, хоць ёсць месца і для іншых музычных жанраў. З 2022 года арганізатарам фестывалю Беларускай бардаўскай ды аўтарскай песні «Бардаўская Восень» выступае фонд «Тутака».
Бардаўская восень- 2024
Сёлета галоўны канцэрт, ужо традыцыйна, прагучаў у Бельску Падляшскім, дзе з беларускімі музыкамі песні спяваў увесь зал. «Добра, што засталося яшчэ такое мерапрыемства», — падкрэслівае музыка Лявон Вольскі.
— Раней гэта было такое свята Бельска Падляшскага — запоўненыя запрошанымі гасцямі і публікай мерапрыемства гасцініцы, дамы культуры, пастаянна была тусоўка, вялікая падзея для Бельска і ўсяго рэгіёну. Я, напрыклад, калісьці выступаў у рамках фестывалю выступаў яшчэ ў Орлі ці ў Гарадку. Ну і вядома — конкурс, гэта для выканаўцаў з Беларусі таксама была важная падзея, паказаць сябе, дзесьці там, засвяціцца, — успамінае Вольскі.
— Не гледзячы на фінансавыя цяжкасці з арганізацыяй фестывалю, думаю, што нашае мерапрыемства даволі багатае, — падкрэслівае галоўны арганізатар фестывалю, старшыня фонду «Тутака» Павел Станкевіч. — Музыка заўсёды была важная, а калі мы сталі арганізоўваць канцэрты, далучылі яшчэ слова, далучылі паэтаў, літаратурныя сустрэчы, тэатр, кінапаказы. Сёлета мы адзначалі сумную гадавіну — ужо год няма з намі бельскай паэтэсы Надзеі Артымовіч.
«Барды», гэтак жа, як і фестываль «Басовішча» — культавае мерапрыемства з 29-гадовым стажам. Апошнія гады фонд «Тутака» намагаецца змяніць чыста музычны характар фестывалю, паказаць тое, што адбываецца ў беларускай прасторы аўтарскай песні, на музычна-літаратурны фармат.
Падрыхтавала Ганна Пятроўская і Марко Заброцкі