Паводле ацэнак урада, прыкладна 20% спажыўцоў энергіі ў Польшчы атрымаюць гэтак званы энергетычны ваўчар. Гэта каля 3,5 млн гаспадарак у краіне.
Спачатку неабходна падаць заяву на атрыманне гэтай аднаразовай дапамогі.
Роберт Тамашэўскі, эксперт па энергетычных пытаннях з Polityka Insight, адзначае, што даплаты на электраэнергію прызначаныя для людзей з самым нізкім узроўнем даходаў, якія больш за ўсё адчуюць падвышэнне цэнаў на энерганосьбіты.
- Гаворка ідзе пра аднаасобовыя хатнія гаспадаркі, гэта напрыклад пенсіянеры - яны скарыстаюцца ваўчарамі ў найбольшай ступені. У спісе ўпаўнаважаных таксама шматдзетныя сем'і, у якіх вялікае спажыванне электрычнасці, асабліва, калі ў іх электрычнае ацяпленне.
Прэтэндаваць на атрыманне энергетычнага ваўчара могуць адзінокія людзі з месячным даходам да 2500 злотых чыстымі (580 еўра), а таксама шмат асабовыя хатнія гаспадаркі з даходам на чалавека да 1700 злотых (395 еўра).
Сума дапамогі будзе складаць 300 злотых для сям'і з аднаго чалавека, 400 злотых для сям'і з двух і трох чалавек, 500 злотых - з чатырох і пяці чалавек і 600 злотых для вялікай сям'і, у якой шэсць і больш чалавек. Марыюш Маршалкоўскі, галоўны рэдактар партала polon.pl, адзначае, што ў пэўных сітуацыях даплата можа быць яшчэ большай.
- У выпадку, калі галоўнай крыніцай ацяплення дому з'яўляецца электраэнергія, напр. цеплавая помпа, або электрычнае ацяпленне, то даплаты становяцца ў два разы больш - напр. адзінокая асоба атрымае не 300 злотых а 600, затым не 400 а 800. Сям'я з мінімум шасці чалавек зможа атрымаць ваўчар на 1200 злотых.
Для атрымання падвойнай сумы даплаты неабходна, каб крыніца ацяплення была ўнесена ў спіс Centralnej Ewidencji Emisyjności Budynków.
1200 злотых гэта максімальная сума даплаты на электраэнергію. Адзначым, што ваўчар з'яўляецца аднаразовай даплатай у гэтым годзе. Заяўкі прымаюцца да канца верасня.
Замежнік таксама можа прэтэндаваць на энергетычны ваўчар, пры ўмове што:
- знаходзіцца на тэрыторыі Польшчы на падставе дазволу на пастаяннае пражыванне, дазволу на доўгатэрміновае жыхарства ў Еўрапейскім Саюзе, дазволу на часовае пражыванне
- у сувязі з атрыманнем статусу бежанца або дадатковай абароны ў Рэспубліцы Польшча,
- у сувязі з атрыманнем віду на жыхарства з гуманітарных меркаванняў
Замежніку абавязкова прад'явіць адпаведныя дакументы, якія пацвярджаюць яго знаходжанне на тэрыторыі Польшчы.
яс/IAR
