Прэзідэнт Украіны Уладзімір Зяленскі, выступаючы на Мюнхенскай канферэнцыі па бяспецы шмат гаварыў пра Беларусь, нагадаўшы, сярод іншага, што там размешчана расійская ядзерная зброя і адтуль здзяйсняецца гібрыдная атака на межы ЕС, у тым ліку, на Польшчу. Украінскі лідар рытарычна запытаўся ў еўрапейскіх пратнёраў, ці гатовы яны адбіць расійскую агрэсію пад чужым суцягам.
«Мы павінны ўсвядоміць, што Беларусь стала расійскай правінцыяй. І задаць пытанне, што нам з гэтым рабіць, што мы можам зрабіць да наступнага магчымага нападу, да ўварвання», — заклікаў украінскі лідар:
— А калі ў наступны раз гэта не мігранты? Што, калі гэта расійскія або паўночнакарэйскія вайскоўцы? Паўночнакарэйскія вайскоўцы не слабыя, яны вучацца весці сучасную вайну. Што з вашымі войскамі, ці гатовыя яны да гэтага? Што, калі Расія пачне аперацыю пад фальшывым сцягам або без апазнавальных знакаў, як у выпадку нападу з Беларусі або акупацыі Крыма ў 2014 годзе? Як хутка адрэагуюць саюзнікі?
Уладзімір Зяленскі, выступаючы на асноўнай сесіі Мюнхэнскай канферэнцыі, таксама прапанаваў стварыць геапалітычную мяжу паміж міжнародным правам і вайной, якая павінна прайсці па ўсходніх межах Украіны, Беларусі, краін Балтыі і Фінляндыі.
У сваю чаргу, лідарка беларускай апазіцыі Святлана Ціханоўская заклікала ў Мюнхене дапамагчы Беларусі вярнуцца ў еўрапейскую сям’ю. Беларуская апазіцыянерка працытавала ўкраінскага прэзідэнта, які ў Мюнхене заявіў, што мяжа Еўропы — гэта ўсходняя мяжа Беларусі:
— Не выключайце Беларусь, не будуйце новую жалезную заслону паміж Еўропай і маёй краінай. Дапамажыце мне вярнуць Беларусь у яе сапраўдную сям'ю еўрапейскіх краін. Тады я буду шчаслівая і мой народ будзе шчаслівы. Беларусь, якую я хачу, — гэта еўрапейская краіна без палітвязняў, без тыраніі. Дзе я змагу атрымліваць асалоду ад дэмакратыі і толькі яе ўмацоўваць.
Святлана Ціханоўская ў Мюнхене, сярод іншых амерыканскіх і еўрапейскіх палітыкаў, яна сустрэлася з генералам Кітам Келагам, які ў адміністрацыі прэзідэнта ЗША Дональда Трампа прызначаны спецпасланнікам ЗША па пытаннях Украіны і Расіі, адказвае за пытанні мірных перамоў па Украіне.
Рэдактар выдання Belarus Security Blog Зміцер Міцкевіч звярнуў увагу на жаданне адміністрацыі ЗША змусіць Еўропу больш актыўна заняцца прасоўваннем сваіх жа інтарэсаў:
— У ЗША ёсць уласныя інтарэсы і яны іх актыўна прасоўваюць. Вашынгтон хоча ад Еўропы большага ўдзелу ва ўласнай абароне і большай актыўнасці ў палітычнай актыўнасці на еўрапейскім кантыненце. У новую архітэктуру бяспекі ў Еўропе можа быць уключана Беларусь. Магчыма Крамлю ўжо пастаўлены пэўныя ўмовы па Беларусі. (...)
Аднак Еўропа застаецца важным рэгіёнам для ЗША, у гэтым кантэксце таксама гаворыцца і пра Беларусь. Я не падзяляю агульных песімістычных поглядаў на конт будучага заангажавання Амерыкі ў Еўропе. (...)
Адміністрацыя Трампа не збіраецца здаваць Еўропы, і здваць Украіну, так як гэта было ў Афганістане. Дональд Трамп не можа пачынаць свой прэзідэнцкі тэрмін з паразы. Прыгадваюцца словы віцэ-прэзідэнта ЗША, аб тым што Вашынгтон мае інструменты ціску на Расію, як эканамічныя, так і мілітарныя. (...)
Пра што на самой справе афіцыйны Мінск можа размаўляць з адміністрацыяй ЗША слухайце ў далучаным гукавым файле!
Cлухайце аўдыё!
эж