У чацвер у Ізраілі адбудзецца адзначэнне гадавіны вызвалення нямецкага канцлагера Аўшвіц-Біркенаў, які ў часы Другой сусветнай вайны знаходзіўся ў польскім горадзе Асвенцім.
Выданне Do Rzeczy на сваім сайце прыводзіць інфармацыю радыё РМФ ФМ, што прэзідэнт Анджэй Дуда стварыў крызісны штаб, у склад якога ўвайшлі гісторыкі ды эксперты. Яны намераны аператыўна рэагаваць на хлуслівыя і маніпуляцыйныя заявы Уладзіміра Пуціна падчас цырымоніі ў Ерусаліме. У сваю чаргу ў польскім ды ізраільскім друку выйдзе серыя інтэрв’ю і тэкстаў, прысвечаных гісторыі Польшчы.
У Ерусаліме, акрамя прадстаўнікоў ЗША, Францыі, Германіі і Вялікабрытаніі, выступіць з прамовай прэзідэнт Пуцін. Пасля апошняй серыі яго абуральных ды ілжывых заяваў на тэму Польшчы можна спадзявацца, што яго выступленне будзе нагодай зноў напасць на Польшчу. Эксперты з крызіснага штабу аператыўна адрэагуюць на яго словы і дадуць адэкватны адказ.
У польскіх СМІ плануецца змясціць серыю інтэрв’ю з прэзідэнтам Анджэем Дудам, урад у сваю чаргу рыхтуе між іншым платныя публікацыі ў амерыканскіх ды ізраільскіх выданнях, якія прадставяць польскую версію гістарычных падзей. Па інфармацыі радыё РМФ ФМ, Масква можа ўжо ведаць пра планы Польшчы і пастараецца іх абясшкодзіць.
нг