«З учорашняга дня мы атрымалі мноства сігналаў грамадскай падтрымкі ў Польшчы. Я хацеў бы падзякаваць прэзідэнту Анджэю Дуду і многім іншым сябрам Ізраіля ў Польшчы, якія падтрымліваюць ізраільскую дзяржаву ў гэты цяжкі момант», – заявіў у нядзелю, 8 кастрычніка, амбасадар Ізраіля ў Польшчы Якаў Ліўнэ, якога цытуе партал onet.pl.
Дыпламат падкрэсліў, што Ізраіль працягне рабіць усё неабходнае для абароны ізраільскай дзяржавы. «Гэта вайна, якую мы павінны выйграць і якую мы выйграем», - упэўнены Ліўнэ.
Адказваючы на пытанне, ці магла Расія адыграць ролю ў правакаванні нападаў, ён сказаў, што задзейнічаныя тэрарыстычныя арганізацыі з'яўляюцца філіяламі «рэжыму аяталы ў Іране, які актыўна падтрымлівае тэрарыстычную дзейнасць у Ізраілю і супраць ізраільскіх аб'ектаў па ўсім свеце».
«Зараз мы назіраем за міжнароднай арэнай, і я думаю, што ў бліжэйшы час стане добра вядома, хто Ізраілю сябар, хто на баку цывілізацыі, а хто на баку варварства», – адзначыў ізраільскі дыпламат.
У сваю чаргу, міністр замежных спраў Польшчы Збігнеў Рау пагаварыў са сваім ізраільскім калегам Элі Коэнам аб нападзе ХАМАС. Збігнеў Рау выказаў спачуванні ў сувязі з жорсткімі атакамі на Ізраіль.
«Я асудзіў гвалт, які сыходзіць з сектара Газа, асабліва тэрарыстычныя акты супраць мірнага насельніцтва», - падкрэсліў Збігнеў Рау, дадаўшы, што размова таксама закранула дзеянні Ізраіля па абароне сваіх грамадзян і шляхоў аднаўлення міру.
Нагадаем, 7 кастрычніка баевікі ХАМАС ажыццявілі масіраваную атаку на Ізраіль. Станам, на раніцу 9 кастрычніка вядома пра больш за 700 загінуўшых у Ізраілю, 2382 пацярпелых. Каля мяжы з сектарам Газа былі знойдзены целы як мінімум 260 чалавек, якіх ісламскія баевікі забілі падчас музычнага фестывалю.
Паводле ізраільскага войска, баі з баевікамі ХАМАС вядуцца ўжо трэці дзень. Ізраіль нанёс новыя ўдары па сектары Газа, ХАМАС атакаваў Ашкелон.
эж