Міністэрства аховы здароўя навучае педагогаў распазнаваць наркатычнае апʼяненне ў вучняў, распавёў у эфіры СТВ міністр аховы здароўя Уладзімір Каранік пасля нарады ў кіраўніка дзяржавы па пытаннях процідзеяння распаўсюду наркотыкаў і прафілактыкі наркаманіі, пра што піша Белсат.
«Мы цяпер распрацавалі метадычныя рэкамендацыі для таго, каб педагогі ў школах маглі вызначаць прыкметы ўжывання дзецьмі псіхаактыўных рэчываў», – паведаміў Каранік.
Міністр прызнаў, што сёння ў грамадстве не заўсёды хапае інфармацыі.
«На сённяшні дзень сапраўды, магчыма, не хапае інфармацыі аб тым, што практычна ва ўсіх дзяржаўных аптэках і ў крамах медтэхнікі ёсць тэсты, якія дазваляюць вызначыць, што ваш блізкі ўжываў найбольш распаўсюджаныя псіхаактыўныя рэчывы.
Пра гэта мала хто ведае. І калі ў маці паўсталі пытанні, што, магчыма, яе дзіця ўжывае такія рэчывы, яна можа гэты тэст купіць і праверыць», – сказаў міністр.
Ён падкрэсліў, што найбольш эфектыўны метад барацьбы з нарказалежнасцю – прафілактыка. Бо нягледзячы на выкарыстанне сучасных методык, частата рэцыдываў дасягае 80-85%.
нг