Як мінімум 2 150 дзяцей з акупаванай Расіяй Украіны былі прымусова дэпартаваныя ў Беларусь, дзе яны падвяргаюцца антыўкраінскаму перавыхаванню і расісцкай ідэалогіі, кажа апазіцыянер былы амбасадар Беларусі ў Польшчы Павел Латушка, якога цытуе старонка wnp.pl. Пра ролю Беларусі ў выкраданні ўкраінскіх дзяцей палітык распавёў падчас адмысловай прэс-канферэнцыі, якая адбылася ў штаб-кватэры агенцтва «Укрінфарм».
Паводле Латушкі, беларускі дыктатар Аляксандр Лукашэнка, у рамках Саюзнай дзяржавы асабіста падпісвае дакументы аб фінансаванні мерапрыемстваў, звязаных прыёмам дзяцей з тэрыторыі Украіны. Паводле яго, летась у Беларусь былі дэпартаваныя 1 150 украінскіх дзяцей, а з пачатку бягучага года – 1 000.
«Паводле нашых дадзеных, мы можам пацвердзіць, што не менш за 2 150 украінскіх дзяцей былі дэпартаваныя на тэрыторыю Беларусі», – сказаў Латушка. Паводле яго, гэтыя злачынныя дзеянні фінансаваліся з бюджэту Саюзнай дзяржавы на суму каля 29 мільёнаў расійскіх рублёў. Дзяцей перасяляюць з акупаванай Данецкай вобласці пры дапамозе Фонду «Дэльфін» і беларускага фонду Аляксея Талая. Вядома пра чатыры месцы пражывання ўкраінскіх дзяцей – тры ў Мінскай вобласці і адно – у Гомельскай вобласці.
Старонка wnp.pl нагадвае, што 17 сакавіка Міжнародны крымінальны суд у Гаазе выдаў ордэр на арышт Уладзіміра Пуціна і расійскага ўпаўнаважанага па правах дзіцяці Марыі Львовай-Бяловай, якія паводле суддзяў маюць дачыненне да ваенных злачынстваў, звязаных з незаконнай дэпартацыяй дзяцей з акупаванай Украіны ў Расію.
аз