Аляксандр Лукашэнка заявіў аб неабходнасці ўзмацнення ідэалагічнай працы, прапаганды і контрпрапаганды.
«Хачу, каб маладыя журналісты гэта засвоілі. Не варта саромецца такіх слоў і паняццяў. Ці на Захадзе іх няма? Проста назвалі іншым словам, піяр, гэта значыць работа з грамадкай думкай. Сутнасць адна. Вось і няхай працуюць з грамадскай думкай на сваёй тэрыторыі», – працытавала Аляксандра Лукашэнку дзяржаўнае агенцтва БелТА.
«Нас не трэба карміць балбатнёй пра нібыта незалежныя СМІ, дэмакратычныя каштоўнасці. Мы ж бачым, як яны кідаюць у турмы сваіх журналістаў, закрываюць медыя і пераследуюць кожнага, хто асмеліўся не пагадзіцца з палітыкай і дзеяннямі ўлады», – заявіў Лукашэнка і ў якасці прыкладаў назваў ЗША, Еўрасаюз, Малдову, краіны Балтыі, Украіну і Грузію.
Насамрэч у гэтых краінах няма фактаў зняволення журналістаў, у адрозненне ад Беларусі, дзе за выказванні іншых думак людзі атрымліваюць вялікія тэрміны пазбаўлення волі.
У пералічаных Лукашэнкам краінах змагаюцца з распаўсюдам расейскай прапаганды і расследуюць факты фінансавання Расеяй еўрапейскіх палітыкаў, каб скараціць вайсковую дапамогу Украіне, на якую напала Расія.
У Беларусі ў зняволенні цяпер 35 прадстаўнікоў медыя.
svaboda.org/вх
