11 чэрвеня адбыўся пажар на Наваполацкім ААТ «Нафтан». Падраздзяленні МНС ліквідавалі ўзгаранне, паведамілі ў прэс-службе Міністэрства надзвычайных сітуацыяў Беларусі.
Паводле МНС, гарэў блок абаротнага водазабеспячэння ў градзірні (прыладзе, прызначанай для ахаладжэння вялікай колькасці вады накіраванай плынню атмасфернага паветра).
«Папярэдне ў выніку інцыдэнту атрымаў апёкі мужчына 1975 году нараджэння, работнік спецыялізаванага рамонтна-будаўнічага ўпраўлення № 3 горада Наваполацка», – паведаміла МНС.
Прычына пажару высвятляецца.
Іншыя падрабязнасці здарэння, а таксама стан пацярпелага работніка пакуль невядомыя.