Расійскую інфармацыйную сістэму «Мір» прапануецца выкарыстоўваць для абмену інфармацыяй аб асобах, якія перасякаюць знешнія межы Саюзнай дзяржавы, паведамляе «Позірк» са спасылкай на РБК.
Адзначаецца, што адпаведны праект пастановы ўрада РФ падрыхтаваны ў рамках пагаднення паміж урадамі Расіі і Беларусі «Аб узаемным прызнанні віз і па іншых пытаннях, звязаных з уездам замежных асоб і асоб без грамадзянства на тэрыторыі дзяржаў – удзельніц дагавора аб стварэнні Саюзнай дзяржавы».
У адпаведнасці з праектам пастановы, «плануецца забяспечыць міждзяржаўнае міжведамаснае інфармацыйна-тэлекамунікацыйнае ўзаемадзеянне, а таксама магчымасць вырабу, афармлення і кантролю звароту дакументаў, якія ідэнтыфікуюць асобу праз сістэму «Мір».
Сярод інфармацыі, доступ да якой у выпадку прыняцця пастановы атрымае МУС Беларусі, будуць звесткі аб выдадзеных і ануляваных дазволах на ўезд і знаходжанне, а таксама перасячэнні межаў Расіі ў пунктах пропуску.
У міжурадавым пагадненні таксама гаворыцца, што дадзеныя будуць перадавацца толькі па запыце – свабоднага доступу да іх не прадугледжана.
Сістэма «Мір» была створаная ў 2015 годзе для барацьбы з незаконнай міграцыяй. Яна аб’ядноўвае дзве дзяржінфармсістэмы: вырабу, афармлення і кантролю пашпартна-візавых дакументаў новага пакалення, а таксама міграцыйнага ўліку.
Першапачаткова меркавалася, што пагадненне аб узаемным прызнанні віз паміж Расіяй і Беларуссю пачне дзейнічаць з 2024 года, аднак у сакавіку 2024-га тагачасны амбасадар Беларусі ў Расіі Дзмітрый Круты заявіў, што толькі да канца года краіны запусцяць інфармацыйную сістэму абмену звесткамі.
Пры гэтым з 2020 года паміж краінамі дзейнічае пагадненне, якое дазваляе замежнікам, якія маюць візу адной з краін, свабодна перасякаць мяжу другой краіны без атрымання дадатковых дазвольных дакументаў.
аз
