Прадстаўнік беларускай апазіцыі Павел Латушка ў інтэрв'ю Polskie Radio выказаў меркаванне, што Аляксандр Лукашэнка, баючыся гандлёвай блакады з Захадам, можа спыніць развіццё міграцыйнага крызісу.
Намеснік кіраўніка апазіцыйнага Абʼяднанага пераходнага кабінета міністраў Беларусі Павел Латушка мяркуе, што пагроза Польшчы цалкам перакрыць тавараабарот з Беларуссю – аргумент, які напалохаў Лукашэнку:
– Паводле нашай інфармацыі на некалькіх закрытых нарадах аналізавалі вынікі, якія могуць быць для беларускай эканомікі, калі Польшча пойдзе на закрыццё мяжы, і да яе далучацца Літва і Латвія. Эфекты будуць моцныя, а гэта ўдар па яго ўладзе.
Павал Латушка дадае, што ад закрыцця беларускай мяжы для тавараў страціць і Кітай, які таксама адпраўляе сваю прадукцыю транзітам праз Беларусь.
З мінулага тыдня на Брэсцкім палігоне ідуць беларуска-кітайскія вайсковыя вучэнні.
IAR/вх