«Прэзідэнт Анджэй Дуда выкарыстаў свой дзяржаўны візіт у Пекін у канцы чэрвеня, каб звязаць пытанне міграцыі і грузавых перавозак праз мяжу з Беларуссю», – піша Bloomberg са спасылкай на людзей, знаёмых з ходам перамоваў.
Апошнія тры гады Аляксандр Лукашэнка спрабаваў узмацніць міграцыйны крызіс на мяжы з Польшчай працягласцю каля 400 км, але апошнім часам колькасць нелегальных перасячэнняў «істотна скарацілася», падкрэслівае агенцтва. Напружанасць узрасла ў траўні, калі польскі салдат, які ахоўваў мяжу, быў забіты мігрантам. Урад у Варшаве тады вырашыў выдзеліць каля 2,5 мільярдаў долараў на ўмацавання мяжы.
Мяжа стала пунктам дыпламатычнага ціску. Паколькі напад Расіі на Украіну перарваў гандлёвыя шляхі праз Украіну, Беларусь стала адзінай краінай, праз якую кітайскія тавары могуць ехаць у ЕС чыгункаю.
У першым квартале гэтага года колькасць перавезеных праз беларуска-польскую мяжу кантэйнераў павялічылася на 89%, паведамілі ў Еўразійскай чыгуначнай асацыяцыі.
Для Лукашэнкі павелічэнне кітайскага чыгуначнага транзіту было вельмі выгадным, бо аслабіла практычна поўную залежнасць Беларусі ад Расіі, якая забяспечвае Мінск таннымі энерганосьбітамі і крэдытамі, піша Bloomberg.
Пасля вяртання Дуды з Пекіну Польшча 2 ліпеня абвясціла, што ўвядзе дэталёвы кантроль на пераходзе Малашэвічы на мяжы з Беларуссю на 33 гадзіны.
Міністр замежных спраў Польшчы Радаслаў Сікорскі заявіў Bloomberg, што ўзняцце Польшчай пытання транзіту грузаў у перамовах з Кітаем «магло стаць фактарам» зніжэння нелегальных перасячэнняў мяжы. «Мы па-ранейшаму вельмі абураныя забойствам нашага салдата на мяжы», – адзначыў ён.
Візіт прэзідэнта Польшчы ў Кітай прыцягнуў увагу Лукашэнкі, які 2 ліпеня заявіў, што Дуда «прасіў (кітайскага лідара) Сі Цзіньпіна паўплываць на Лукашэнку і Пуціна, каб пакласці канец міграцыі».
У адказе на пытанні Bloomberg 11 ліпеня МЗС Кітая напісаў, што Пекін «спадзяецца, што бакі змогуць адэкватна вырашыць свае рознагалоссі шляхам дыялогу» і «забяспечыць бяспеку і бесперабойнасць міжнародных лагістычных каналаў».
Bloomberg спасылаецца на меркаванне Конрада Паплаўскага з Цэнтру ўсходніх даследаванняў, што хаця толькі невялікая частка кітайскага экспарту ідзе ў Еўропу праз Беларусь, крызіс у Чырвоным моры і яго ўплыў на марскі транспарт робяць еўразійскае чыгуначнае злучэнне больш папулярным.
«Пакуль паспяховае выкарыстанне Варшавай стратэгічнай слабасці супраць Кітая можа быць урокам для тых, хто прымае палітычныя рашэнні. Пекін, які, паводле Паплаўскага, зʼяўляецца «гандлёвым партнёрам, але таксама канкурэнтам і сістэмным супернікам» для ЕС, здольны змяніць сваю тактыку, калі Еўрасаюз «гатовы несці эканамічныя выдаткі» ў выпадку пагрозы сваім ключавым інтарэсам», — рэзюмуе Bloomberg.
PAP/вх
