Еўрапейская служба замежных сувязяў і Еўрапейская камісія ў супрацоўніцтве з Еўрапарламентам арганізавалі «Дні Беларусі» для падтрымкі дэмакратычных сіл і грамадзянскай супольнасці. Яны праходзяць з 9 па 13 снежня 2024 году ў Бруселі, – паведамляе svaboda.org.
На імпрэзах чакаецца ўдзел больш як 100 прадстаўнікоў беларускіх дэмакратычных сілаў, грамадзянскай супольнасці, незалежных СМІ, праваабарончых арганізацый, культурных устаноў, а таксама беларускай дыяспары. Запрошаны і прадстаўнікі міжнародных арганізацый.
Сярод іншага, у праграме падзей чакаюцца: інтэрактыўная выстава #FramedInBelarus, створаная беларускай мастачкай Руфінай Базловай і праектам Stitchit & Collectiv; 4-е пасяджэнне Кансультацыйнай групы ЕЗ з беларускімі дэмакратычнымі сіламі і грамадзянскай супольнасцю; шэраг канферэнцый высокага ўзроўню і іншае.
«Дні Беларусі» арганізаваныя ў кантэксце пачатку працы новага складу Еўрапарламенту і на фоне прэзідэнцкіх выбараў у Беларусі, прызначаных на 26 студзеня 2025 году.
эж