Беларусь гатова да правядзення ўзаемных ваенных інспекцый з Польшчай на глыбіню 80 км. Аб гэтым журналістам заявіў начальнік Дэпартамента міжнароднага ваеннага супрацоўніцтва - памочнік міністра абароны па пытаннях міжнароднага ваеннага супрацоўніцтва Валерый Равенка, перадае карэспандэнт БЕЛТА.
«Мы па сетцы сувязі АБСЕ апавясцілі нашых суседзяў аб тым, што гатовы да правядзення мерапрыемстваў у рамках рэгіянальных мер даверу і бяспекі па Венскім дакуменце 2011 года. Гэта азначае, што мы гатовы да працэсаў перагавораў, гатовы да працэсаў наведвання воінскіх часцей - гэта значыць інфармацыйны абмен - і да правядзення ўзаемных інспекцый», - заявіў Валерый Равенка.
Такім чынам, падкрэсліў ён, Польшча можа пераканацца, што Беларусь не назапашвае сілы і сродкі для якіх-небудзь агрэсіўных дзеянняў, а таксама ў тым, што беларускі бок міралюбівы, гатовы да дыялогу і супрацоўніцтва. У сваю чаргу Беларусь можа пераканацца ў тым, што на тэрыторыі Польшчы не назапашваецца патэнцыял, сілы і сродкі для правядзення агрэсіўных дзеянняў у адносінах да Саюзнай дзяржавы.
«Мы ведаем аб аперацыі «Бяспечнае Падляшша», ведаем, што фарміруюцца тры дывізіі, у тым ліку ў названым прамежку - 80 км ад мяжы Беларусі. І наша прапанова з'яўляецца своеасаблівым тэстам і своеасаблівым паказчыкам палітыкі Польшчы, - канстатаваў Валерый Равенка. - Калі наш заходні сусед будзе гатовы да гэтых мерапрыемстваў, мы, адпаведна зразумеем, што палітыка міралюбівая і накіраваная на пошук кампрамісу і ўсталяванне добрасуседства. Калі Польшча адмовіцца і праігнаруе дадзеныя мерапрыемствы, у нас будзе іншае меркаванне аб палітыцы Польшчы. І мы будзем будаваць сваю палітыку, у тым ліку ваенную, зыходзячы з гэтых вынікаў».
У сярэдзіне верасня пройдуць вучэнні «Захад-2025».
Белта/ав