Камітэт па правах чалавека ААН вынес рашэнне па скаргах 16 беларусаў, якіх у 2020–2021 гадах штрафавалі за вывешванне бел-чырвона-белай сімволікі на вокнах і аўтамабілях. Іх прызналі вінаватымі ў «несанкцыянаваным пікетаванні» паводле арт. 23.34 КаАП, бо ўлады лічылі, што такія дзеянні — гэта масавае мерапрыемства. Спробы аспрэчыць штрафы ў Беларусі былі безвыніковымі, — піша belsat.eu.
ААН прызнала, што дзяржава парушыла права грамадзян на свабоду выказвання меркавання і абавязана кампенсаваць ім штрафы і судовыя выдаткі, апублікаваць рашэнне і прыняць меры, каб пазбегнуць падобных парушэнняў у будучыні. Камітэт адзначыў: размяшчэнне БЧБ-сімволікі — гэта выраз палітычнай думкі, і пакаранне за яго супярэчыць міжнародным абавязацельствам Беларусі.
Разам з тым частка патрабаванняў — пра парушэнне свабоды сходаў, справядлівага суда і абарону ад адвольнага затрымання — была прызнаная недастатковай, бо вывешванне сцяга не з’яўляецца «сходам», а некаторыя довады не ўздымаліся ўнутры краіны.
эж