27-гадовага ўраджэнца Кобрынскага раёна Вадзіма Багданава асудзілі па артыкуле аб «садзейнічанні экстрэмісцкай дзейнасці» пасля вяртання з Польшчы. Пра гэта паведамляе «Наша Ніва».
Паводле інфармацыі выдання, Багданава затрымалі напрыканцы 2025 года пасля прыезду ў Беларусь і змясцілі ў СІЗА. Пазней Брэсцкі абласны суд прызнаў яго вінаватым паводле частак 1 і 2 артыкула 361-4 Крымінальнага кодэкса. Які менавіта тэрмін пакарання яму прызначылі, афіцыйна не паведамляецца, аднак, як адзначае выданне, імаверна, мужчыну асудзілі да пазбаўлення волі.
Да пераезду за мяжу Багданаў жыў у Кобрыне, працаваў таксістам, а пазней перайшоў у IT-сферу і стаў тэсціроўшчыкам праграмнага забеспячэння. Паводле яго старонак у сацыяльных сетках, у 2024 годзе ён пераехаў у Польшчу, дзе пражываў да вяртання ў Беларусь.
эж