У кастрычніку ў Мінску пройдзе энергетычны і экалагічны форум – піша газета “Звязда”. Мэта правядзення мерапрыемства -- прадставіць сучаснае абсталяванне і тэхналогіі для вытворчасці і размеркавання электрычнай і цеплавой энергіі, аўтаматызаваныя сістэмы, энерга- і рэсурсазберагальныя тэхналогіі, аказаць садзейнічанне інавацыйнаму развіццю паліўна-энергетычнага комплексу краіны.
Штогод форум становіцца ўнікальным месцам сустрэч энергетыкаў і эколагаў Беларусі і замежжа, спрыяючы тым самым пашырэнню супрацоўніцтва, абмену перадавымі распрацоўкамі і праектамі.
У структуры экспазіцыі прадугледжаны галіновыя раздзелы міністэрстваў энергетыкі, прамысловасці, прыродных рэсурсаў і аховы навакольнага асяроддзя, жыллёва-камунальнай гаспадаркі, дзяржаўных камітэтаў па навуцы і тэхналогіях, па стандартызацыі, Беларускага дзяржаўнага канцэрна па нафце і хіміі.
У выставе плануюць удзел вядучыя прадпрыемствы энергетычнай галіны Беларусі, а таксама вядомыя сусветныя брэнды, такія як Siemens, Schneider Electric, Расатам, Таўрыда Электрык, Eaton, Bertsch, KSB, CHINT, Klinkmann і іншыя.
Насычаная дзелавая праграма форуму ўключае пленарную сесію, форумы, канферэнцыі, семінары, круглыя сталы, прэзентацыі кампаній-удзельнікаў выставы, на якіх айчынныя і замежныя эксперты прадставяць сучасныя тэхналагічныя рашэнні ў галіне энергетыкі, нафтахіміі, энергазберажэння і экалогіі.