Першапачатковыя прапановы з Масквы былі "абсалютна непрымальныя" для Беларусі. Яны датычылі стварэння нейкіх "наднацыянальных структур", ад чаго ў далейшым адмовіліся. Пра гэта ў інтэрв'ю РБК распавёў міністр замежных спраў Беларусі Уладзімір Макей, перадае Еўрарадыё. Адной з галоўных тэмаў былі інтэграцыйныя працэсы ў дачыненнях нашай краіны і Расійскай Федэрацыі. Па словах Макея, "праграма паглыбленай інтэграцыі" не нясе нейкай пагрозы для незалежнасці Беларусі. А пабудаваць федэрацыю ці канфедэрацыю з іншай дзяржавай ужо немагчыма, мяркуе беларускі міністр.
"Ужо некалькі пакаленняў вырасла ў незалежнай дзяржаве, і ніхто не гатовы пакласці на алтар гэтую незалежнасць, — гаворыць Уладзімір Макей. — ...Я ўвогуле не разумею, як мог бы першы прэзідэнт краіны, які стварыў незалежную дзяржаву, ахвяраваць гэтай незалежнасцю, і кім бы ён увайшоў у гісторыю".
Макей падкрэслівае, што згаданая інтэграцыйная праграма адпавядае саюзнай дамове Беларусі і Расіі 1999 года. Што да "непрымальных прапаноў", то іх ініцыявалі "некалькі [расійскіх] структур". Пасля сустрэчы Аляксандра Лукашэнкі і Уладзіміра Пуціна ў Санкт-Пецярбургу ад прапаноў адмовіліся, паколькі яны не адпавядалі зместу саюзнай дамовы. Падчас перамоваў сканцэнтраваліся "на эканамічнай праблематыцы".
"Суверэнітэт для абедзвюх дзяржаў — гэта святое, і Беларусь не мае намеру ахвяраваць ім ва ўгоду нейкім кан'юнктурным меркаванням", — сказаў міністр замежных спраў краіны.
эж