У раскладзе руху міжнародных аўтобусаў на Берасцейскім вакзале з’явіліся шэраг рэйсаў у Польшчу і Чэхію. Першыя рэйсы адправіліся 29 траўня, а з 31 траўня яны стануць штодзённымі, паведамляе тэлеканал «Белсат».
Аўтобусы ў Бялую-Падляску з Берасця распачнуць адпраўляцца з вакзалу штодня з 31 траўня. Акрамя таго, з'явіцца штодзённы маршрут у Варшаву. Да 30 чэрвеня будзе курсаваць аўтобус у Гданьск.
З першага да 16 чэрвеня штодня будзе курсаваць аўтобус з Мінску ў Прагу. Іншыя міжнародныя маршруты ў Прыбалтыку, Украіну, Расею і краіны Заходняй Еўропы пакуль адмененыя.
Перавознікі цяпер не толькі польскія фірмы, але і беларускія.
Зʼяўленне міжнародных маршрутаў стала магчымым дзякуючы пастанове Саўміну, якая ўступіла ў сілу з 29 траўня. Паводле дакументу «Аб захадах па перадухіленні завозу і распаўсюду інфекцыі, выкліканай каронавірусам COVID-19», раней абавязковы каранцін кіроўцаў, якія выконваюць міжнародныя аўтамабільныя перавозкі пасажыраў у рэгулярных зносінах, адменены.
эж