Лідар найбольшай польскай апазіцыйнай партыі «Грамадзянская платформа» Гжэгаж Схетына прадставіў асноўныя палажэнні яе перадвыбарчай праграмы. Нагадаем, парламенцкія выбары пройдуць у Польшчы восенню, а права-цэнтрысцкая «Грамадзянская платформа», якая з'яўляецца вядучай сілай праеўрапейскай кааліцыі, – асноўны канкурэнт кансерватыўна-каталіцкай кіруючай партыі «Права і справядлівасць» (ПіС).
Паводле Схетыны, у сваіх перадвыбарчых дзеяннях яго партыя будзе рабіць стаўку на ўмацаванне дэмакратычных свабодаў і дэцэнтралізацыю дзяржавы. Сярод прыярытэтаў кааліцыі пасля магчымай перамогі на выбарах Схетына назваў адмену судовай рэформы, што ажыццяўляецца цяпер партыяй ПіС. Ён таксама заявіў, што сацыяльныя і эканамічныя праграмы, уведзеныя цяперашнім урадам, у тым ліку праграма па фінансавай падтрымцы семʼяў «500+», будуць працягнутыя, але ў новым выглядзе.
Акрамя таго, кіраўнік партыі паведаміў, што ў выпадку перамогі «Грамадзянская платформа» прыме закон аб аднаполых саюзах, што ў большасці краін Еўропы зʼяўляецца стандартам.
Гжэгаж Схетына таксама дэклараваў рэалізацыю маштабнай праграмы праэкалагічных мерапрыемстваў і павелічэнне фінансавання культуры, медыцыны і іншых галін грамадскага жыцця.
вс
