Прадпрыемства па эксплуатацыі нафтаправодаў (PERN) пашырае інфраструктуру для забеспячэння поўнай дыверсіфікацыі паставак нафты і газу. Як запэўніваюць прадстаўнікі кампаніі, у 2023 годзе Польшча дасягне энергетычнай незалежнасці ў гэтай галіне.
Вясной 2020 года павінны быць завершаны работы па будаўніцтве новых сховішчаў у гданьскай сядзібе PERN, а восенню наступнага года плануецца здаць у эксплуатацыю сховішчы ў Гданьскім нафтавым тэрмінале. У сваю чаргу ў 2023 годзе будзе ўведзена ў эксплуатацыю другая нітка паморскага трубаправода.
Паводле ўпаўнаважанага ўраду па справах стратэгічнай энергетычнай інфраструктуры Паўла Наімскага (Paweł Naimski), перад польскай кампаніяй стаіць сур’ёзная задача.
- Гаворка ідзе пра тое, каб дабіцца поўнай дыверсіфікацыі паставак нафты ў Польшчу, асабліва ў нашыя НПЗ, у прыватнасці ў НПЗ у Плоцку. Прыняты ўрадам „Права й справядлівасці” план развіцця паліўнага сектара рэалізуе ў асноўным кампанія PERN.
Ён дадаў, што асновай рэалізацыі гэтага плану будзе будаўніцтва другой ніткі Паморскага нафтаправода.
- Гэтая транзітная труба з нафтапорта ў Плоцк загарантуе тамтэйшаму НПЗ поўную свабоду выбару сыравіны для пераапрацоўкі.
Старшыня кампаніі PERN Ігар Васілеўскі (Igor Wasilewski) падкрэсліў, што кампанія выконвае пастаўленыя перад ёй задачы.
- Мы пашыраем інфраструктуру па захоўванні і перадачы сыравіны. Дзейнічаем з мэтай загарантавання Польшчы поўнага энергетычнага суверэнітэту і незалежнасці. Гэта нашая задача і ўсе нашыя дзеянні праводзяцца з гэтай мэтай.
Кампанія таксама праводзіць падрыхтоўку да другога этапу пашырэння паліўнай базы і будаўніцтва трубаправода Баронаў-Тшэбіня (Boronów - Trzebinia). Трубаправод даўжынёй у амаль 100 кіламетраў будзе праходзіць праз гміны ў Сілезіі і Малапольшчы.
аз