Падчас пандэміі палякі часта выбіралі агратурызм як форму адпачынку. Паводле звестак Галоўнага статыстычнага ўпраўлення, у першым квартале 2022 года прапановамі аграэкатурызму скарысталіся 17 тысяч турыстаў, што ў тры разы больш, чым за аналагічны перыяд мінулага года.
Адпачынак у аграсядзібах заснаваны на выкарыстанні вясковых даброт: свежага паветра, харчавання, зносін з прыродай. Агратурысты цэняць вясковы адпачынак за яго прастату, аўтэнтычнасць і за тое, што ён дазваляе расслабіцца.
Час пандэмічных абмежаванняў памяняў прыярытэты, гаворыць эксперт па пытаннях турызму Марэк Каміньскі:
-Пасля пандэміі мы зразумелі, што неабавязкова праводзіць водпуск у трох-чатырох зорачных гатэлях. Што можна паехаць у невялікую мясцовасць у Польшчы, скарыстацца агратурызмам. У малыя пансіянаты, прыватныя дамы, дзе можна адпачыць з меншай колькасцю людзей. Узнікла мноства новых месцаў, аграсядзібаў, якія маюць багатую праграму адпачынку, напрыклад, кулінарныя курсы па прыгатаванні рэгіянальных страваў.
Агата Баліньска з Галоўнай школы сельскай гаспадаркі ў Варшаве расказвае, што, акрамя прыроды і цішыні, агратурызм – гэта мноства актыўных формаў адпачынку і адукацыйных прапановаў:
-Напэўна прапановы ўладальнікаў аграсядзібаў сталі вельмі багатыя і разнастайныя. Пачынаючы ад актыўнай формы адпачынку: коннай язды, роварных паездак, байдарачных сплаваў, катанне на лодках, да варштатаў на тэму кулінарыі ці рамесніцтва. Насамрэч няцяжка знайсці нечага, што адпавядае нашым патрэбам. Калі я вывучаю прапановы аграсядзібаў, у якія я езджу са студэнтамі ці з экскурсіямі, то кожныя выходныя можна было б правесці ў новым месцы, з прапановамі, якія не паўтараюцца. Уладальнікі – культурныя, прыязныя, крэатыўныя, выдатна кантактуюць з турыстамі. Выбар сапраўды ёсць.
Пшэмыслаў Марчэўскі з Польскай турыстычнай арганізацыі звяртае ўвагу на яшчэ адзін аспект:
-Мы заахвочваем не забываць пра польскія вёскі, якія гарантуюць незвычайныя эмоцыі. Лакальная кухня, польская гасціннасць, блізкасць прыроды. Дадаткова ўзгадаю фінансавы фактар. Напэўна, адпачынак у аграсядзібах будзе значна больш карысны фінансава, чым у вялікіх гарадах, ці найбольш папулярных турыстычных мясцовасцях, дзе большасць людзей праводзяць вакацыі ці доўгія выходныя.
Агратурызм спрыяе развіццю аграсядзіб і мясцовай інфраструктуры. Актывізуе мясцовы рынак працы. Гэта вымушае фермераў пашыраць і мадэрнізаваць жыллёвы фонд. Гэта дае дадатковы прыбытак гаспадарам і мясцовым бюджэтам. У той жа час гэта дазваляе захаваць сямейныя гаспадаркі, спрыяе захаванню вясковага ладу жыцця і працягванню сельскіх традыцый, трымае моладзь на фермах.
Акрамя таго, гэта форма экатурызму, бо аказвае мінімальнае ўздзеянне на навакольнае асяроддзе, не патрабуе капітальных выдаткаў і будаўніцтва новых будынкаў, дзякуючы чаму спрыяе захаванню вясковага асяроддзя.
Калі дадаць да гэтага той факт, што агратурызм часцей за ўсё асацыюецца з арганічнымі фермамі, то атрымліваецца, што гэта самы натуральны від адпачынку. Раслінаводства і жывёлагадоўля з'яўляюцца адной з славутасцяў аграэкатурызму.
ав
слухайце аўдыё