На думку некаторых жыхароў, званы ў адной з парафій Бытама занадта гучныя і таму ім давядзецца змоўкнуць. Чыноўнікі задаволілі скаргі двух чалавек.
– Мы не маем намеру нікому тут перашкаджаць і ўскладняць жыццё, – каментуе пробашч парафіі кс. Генрык Олесь (ks. Henryk Oleś).
«У сувязі з адміністрацыйным рашэннем, вынесеным у дачыненні да парафіі, з 15 ліпеня, мы не можам карыстацца касцельнымі званамі», – гаворыцца ў парафіяльных абвестках, размешчаных на сайце парафіі Божага Цела ў Бытам-Мяховіцах.
Паводле паведамленняў мясцовых СМІ, двое жыхароў паскардзіліся, што «званы занадта гучныя». Мэрыя ў Бытаме падкрэслівае, што пастанова мэра Глівіцэ аб дапушчальных узроўнях шуму не забараняе выкарыстанне царкоўных званоў, але абавязвае прыходы даводзіць узровень шуму да пэўных параметраў.
«Скарачэнне працоўнага часу, памяншэнне частаты званоў на працягу дня або адключэнне званоў павінны спрыяць выкананню парадку, уведзенага субʼектыўным рашэннем», – гаворыцца ў рашэнні чыноўнікаў.
Важна адзначыць, што званы ў парафіі Божага Цела гучаць з 1917 г. Адзіны перапынак адбыўся падчас Другой сусветнай вайны, калі яны былі канфіскаваны для ваенных патрэб. У 1957 г. парафія атрымала чатыры новыя званы, якія цяпер павінны перастаць званіць.
Рашэнне аб званах выклікала рэзананс сярод жыхароў Бытама.
– Я буду сумаваць. Мяне гэта не турбавала, наадварот. Гэта быў вельмі добры знак для мяне, калі я праязджаў міма, так што вельмі шкада, – кажа адзін з жыхароў у інтэрвʼю TVP 3 Katowice.
– Гадзіна, гадзіна і яшчэ мелодыі. Я жыву вельмі блізка і мяне гэта турбуе. Бо людзі працуюць і хочуць адпачыць, – дадае другі.
З каментаром на гэтую тэму выступіў таксама пробашч парафіі кс. Генрык Олесь.
– Званы выкарыстоўваюцца ў культавых мэтах. Мы не маем намеру нікому тут перашкаджаць або ўскладняць жыццё. Мы павінны перастаць званіць. Так я гэта зразумеў і ў мінулую нядзелю давёў гэтую інфармацыю да вернікаў. Іх рэакцыя была бясцэннай, – сказаў ён у эфіры TVP3 Katowice.
onet.pl/вх
