Апеляцыйны суд у Беластоку ў чацвер пакінуў у сіле прысуды чатырох гадоў пазбаўлення волі за шпіёнскую дзейнасць на карысць расійскай вайсковай выведкі ў дачыненні да двух абвінавачаных - беларуса і расіяніна. Прысуд з'яўляецца канчатковым.
Апеляцыйная інстанцыя, разгледзеўшы скаргу пракуратуры і абаронцаў, змяніла кваліфікацыю ўчынку, палічыўшы, што абвінавачаныя бралі ўдзел у дзейнасці знешняй разведкі, у прыватнасці ГРУ, супраць Рэспублікі Польшча, якая заключалася ў выкананні задач у галіне распазнання ваенных аб’ектаў, якія маюць вырашальнае значэнне для абароны Польшчы і яе міжнароднага становішча, а таксама шляхам атрымання інфармацыі ад прафесійных вайскоўцаў польскіх узброеных сіл адносна баяздольнасці, маральнага духу і функцыянавання польскіх узброеных сіл падчас пагрозы.
Спагнанні, накладзеныя ў першай інстанцыі, пакінутыя ў сіле.
Нагадваем, паводле арт. 130.1 Крымінальнага кодэкса, кожны, хто ўдзельнічае ў дзейнасці замежнай разведкі або дзейнічае ад яе імя супраць Рэспублікі Польшча, караецца пазбаўленнем волі на тэрмін не менш за пяць гадоў.
Аднак Акруговы суд у Беластоку, гэта значыць першая інстанцыя, прымяніў больш спрыяльныя для падсудных палажэнні, якія дзейнічалі раней, калі прадугледжвалася пакаранне ад аднаго да дзесяці гадоў пазбаўлення волі і ў лютым прысудзіў абодвух абвінавачаных да чатырох гадоў пазбаўлення волі.
Следства па гэтай справе вёў Дэпартамент вайсковых справаў Акруговай пракуратуры ў Варшаве. Абвінавачванні тычацца шпіянажу на карысць расійскай ваеннай выведкі ў перыяд з 2017 па 2022 год. Паводле пракуратуры, абвінавачаныя збіралі звесткі пра польскія вайсковыя часткі, іх размяшчэнне, развіццё, рыштунак і асабовы склад, а таксама пра вайсковыя часткі хаўруснікаў.
Абодва іншаземцы былі затрыманыя ў красавіку 2022 года. Абвінаваўчае заключэнне было накіравана ў Беластоцкі суд, паколькі шпіёнская дзейнасць адбывалася ў гэтым ваяводстве.
Абодва замежнікі заставаліся ў Польшчы легальна. Паводле высноваў следства, беларус, які спачатку вучыўся ў адной з беластоцкіх ВНУ, а потым заняўся арганізацыяй парашутна-дэсантнай падрыхтоўкі, наладжваў кантакты, якія выкарыстоўваў у сваёй дзейнасці на расійскую вайсковую выведку.
Другі абвінавачаны працаваў на карысць расійскай выведкі пад прыкрыццём нібыта культурна-турыстычнай дзейнасці.
Акрамя таго, як высветліла пракуратура, шпіёнская дзейнасць была сканцэнтравана на вайсковых частках, размешчаных на паўночным усходзе Польшчы. Паводле следства, у рамках гэтай дзейнасці задачай абвінавачаных было выяўленне важных элементаў польскіх узброеных сілаў і атрыманне інфармацыі, у прыватнасці адносна задачаў жаўнераў Войска Польскага ў раёне мяжы з Беларуссю ў сувязі з міграцыйным крызісам, колькасці вайскоўцаў, якія выконваюць задачы ў памежнай зоне, і структуры падраздзяленняў, а таксама выкарыстання спецыялізаванай тэхнікі польскай арміяй, стан маральнага духу і аператыўных магчымасцей або ўзаемадзеянне вайсковых частак, дыслакаваных у паўночнай Польшчы з войскамі іншых краін НАТА.
PAP/аз