Колькасць пацярпелых у выніку расійскага ракетнага ўдару па ўкраінскім Крывым Рогу павялічылася да 41 чалавека. Адзін чалавек загінуў. Ракеты трапілі, у тым ліку, у паліцэйскі ўчастак. Раніцай украінскія ўлады аб'явілі паветраную трывогу на большай частцы тэрыторыі краіны.
Абстрэл Крывога Рогу адбыўся пасля 8 гадзін раніцы. Прэзідэнт Украіны Уладзімір Зяленскі родам менавіта з гэтага горада.
Ноччу расіяне зноў атакавалі з беспілотнікаў украінскія гарады і населеныя пункты. Прадстаўнік СПА паведамляе, што беспілотнікі стартавалі з Прыморска-Ахтарска ў Краснадарскім краю і з акупаванай тэрыторыі Крыма. Акрамя таго, ля берагоў Чорнага мора з’явіўся фрэгат «Адмірал Макараў» з ракетамі «Калібр» на борце.
Генштаб Украіны паведамляе, што ўчора расійскія войскі выпусцілі па Украіне 7 крылатых ракет, здзейснілі 74 бамбёжкі і 46 абстрэлаў з рэактыўнай артылерыі. Адбылося 39 сутычак.
Сітуацыю на ўсходзе і поўдні Украіны Генштаб УСУ называе складанай. У Данецкім басейне і Запарожжы працягваюцца цяжкія баі. Праціўнік інтэнсіўна абстрэльвае ўкраінскія пазіцыі, а таксама населеныя пункты паблізу лініі фронту.
Генштаб паведамляе таксама аб лакальных поспехах украінскіх войскаў на поўдзень ад Бахмута і аб працягу наступлення ў раёне Мелітопаля. Учора ўкраінская авіяцыя бамбавала 10 раёнаў канцэнтрацыі расійскіх войскаў. Ракетныя войскі і артылерыя знішчылі расійскі склад боепрыпасаў, 6 гармат і 2 зенітна-ракетныя батарэі.
IAR/аз