Чарговы абмен палоннымі магчымы ў бліжэйшыя тыдні

Пра гэта паведамляюць украінскія ўлады.

Украінскія ваеннапалонныя, якія ў сераду вярнуліся ва Украіну

PAP/EPA/PRESIDENTIAL PRESS SERVICE / HANDOUT

Учора з расійскага палону ва Украіну вярнуліся 230 украінцаў – большасць з іх гэта вайскоўцы. Іх абмянялі на 248 расійскіх вайскоўцаў. Гэта быў найбуйнейшы абмен з пачатку поўнамаштабнай расійскай агрэсіі. Расіяне дагэтуль утрымліваюць як мінімум некалькі тысяч украінскіх палонных.

Упаўнаважаны па правах чалавека Украіны Дзмітрый Лубінец, які ўдзельнічаў у арганізацыі працэсу абмену, заявіў, што ёсць надзея, што ў бліжэйшы час на радзіму вернецца больш украінскіх ваеннапалонных. Лубінец спадзяецца, што ў гэтым месяцы добрых навінаў будзе больш і ўкраінскі бок працуе ў гэтым кірунку.

Прадстаўнік украінскіх уладаў дадаў, што працэс арганізацыі абмену палоннымі вельмі складаны і тармозіцца Расіяй. Ён падкрэсліў, што фізічны стан усіх вызваленых украінскіх вязняў вельмі кепскі – яны знясіленыя і моцна схуднелі – некаторыя на некалькі дзясяткаў кілаграм.

Паводле афіцыйных украінскіх звестак, у лістападзе мінулага года ў расійскім палоне знаходзіліся 3574 украінскія вайскоўцы і 763 цывільныя асобы. Гэтыя лічбы могуць быць большымі, бо як мінімум 15 тысяч украінскіх вайскоўцаў і 11 тысяч мірных жыхароў лічацца прапаўшымі без вестак.

ав