Прэм'ер-міністр Італіі Джорджыя Мелоні пасля сустрэчы з прэзідэнтам ЗША Дональдам Трампам у Белым доме ў чацвер ацаніла яе як «лаяльную і канструктыўную дыскусію па стратэгічных пытаннях». Яна запэўніла, што адносіны паміж краінамі застаюцца трывалымі.
У пасце на партале X кіраўнік італьянскага ўрада падкрэсліла: «Працуем разам, каб пабудаваць больш моцны Захад».
У справаздачы аб сустрэчы з прэзідэнтам Дональдам Трампам Мелоні адзначыла: «Лаяльная і канструктыўная дыскусія па стратэгічных пытаннях: ад бяспекі да абароны, ад барацьбы з нелегальнай іміграцыяй да гандлёвых адносін».
Прэм'ер-міністр дадала, што запрасіла прэзідэнта ЗША ў Рым і выказала радасць, што ён прыняў яе запрашэнне.
«Гэта будзе яшчэ адна магчымасць умацаваць дыялог паміж нашымі краінамі», — адзначыла Мелоні.
Палітык дадала, што «Італія заўсёды адыгрывала вядучую ролю на міжнароднай арэне, якая хутка змяняецца. І сёння, таксама дзякуючы праведзенай за гэтыя гады працы, да нашага пункту гледжання прыслухоўваюцца і паважаюць».
«Сувязі паміж Італіяй і ЗША застаюцца трывалымі, жыццёва важнымі і вырашальнымі для сумеснага супрацьстаяння вялікім глабальным выклікам», — падкрэсліла італьянская прэм'ер-міністр.
Газеты адзначаюць, што кіраўнік урада запрасіла Трампа ў Рым і прапанавала сустрэцца з лідарамі ЕС. Але, дадаюць, што яна не пераканала яго перадумаць наконт тарыфаў.
У бліжэйшыя гадзіны Джорджыя Мелоні пагутарыць кіраўніком Еўракамісіі Урсулай фон дэр Ляен, каб паведаміць аб размове ў Белым доме. Мелоні спадзяецца «арганізаваць» сустрэчу паміж Трампам і інстытутамі ЕС. Але ў ЕС пакуль скептычна ставяцца да магчымасці пагаднення з ЗША.
ПР/юл