Прэм’ер Маравецкі запэўнівае: Правыя сілы перамогуць на выбарах

Гэта ў цяперашнім інтарэсе Польшчы, пераконвае кіраўнік польскага правага ўраду.

Выбары

ulleo/pixabay.com/CC0 Public Domain

Прэм'ер Матэвуш Маравецкі абʼяўляе, што кіруючая партыя «Права і справядлівасць» пераможа на наступных парламенцкіх выбарах і застанецца пры ўладзе. У інтэрв’ю тыднёвіку «Sieci» кіраўнік польскага ўраду крытыкуе апазіцыю і польскую палітычную сцэну.

«Няма іншай апазіцыі ў Еўропе, якая бачыць магчымасць перамогі толькі ў нейкім няшчасці сваіх суайчыннікаў, у нейкай беднасці краіны, у катастрофе, і якая цынічна трымае за гэта пальцы», – падкрэслівае кіраўнік урада. Суразмоўца газеты лічыць, што такое стаўленне спрыяе імкненню Масквы да дэстабілізацыі.

«Мы павінны абараніць нашу стабільнасць. Пуцін хоча разгрому прапольскіх сілаў – мы павінны даць гэтым сілам яшчэ адзін тэрмін паўнамоцтваў. Гэта ў цяперашніх інтарэсе Польшчы. І я хачу быць зразумелым: мы пераможам на наступных выбарах і будзем далей весці польскія справы добрым курсам... Шанцы на трэці тэрмін паўнамоцтваў вельмі вялікія», – – кажа Матэвуш Маравецкі.

Прэмʼер лічыць, што падчас выбараў палякі будуць выбіраць «паміж праектам развіцця, які прадстаўляюць кіруючыя правыя сілы, і стагнацыяй у спалучэнні з паслухмянасцю ў дачыненні да знешніх сіл», – пераконвае прэм’ер ў інтэрвію тыднёвіку «Sieci».

аз