Сардзінія, італьянскі востраў, адно з папулярных месцаў адпачынку еўрапейцаў, мае незвычайную прапанову для турыстаў у выглядзе бясплатнага пражывання. Аднак павінны быць выкананыя дзве ўмовы.
Cammino Minerario di Santa Barbara (CMSB), адзін з фондаў, якія працуюць на Сардзініі – італьянскім востраве, любімым турыстамі – прапануе наведвальнікам бясплатнае жыллё.
Арганізацыя, якая працуе над прасоўваннем пешаходнай сцежкі Санта-Барбара на Сардзініі, вырашыла, што такое рашэнне заахвоціць маладых людзей наведаць гэтую частку італьянскага вострава.
Як працуе гэтая прапанова? Па-першае, турысты павінны пайсці ў паход па гістарычнай сцежцы Санта-Барбары, а па-другое, мець узрост не больш за 35 гадоў.
Тыя, хто адпавядае гэтым патрабаванням, атрымаюць ад фонда Cammino Minerario di Santa Barbara (CMSB) бясплатнае пражыванне на тры ночы. Як адзначаецца, фонд прапануе пакрыццё выдаткаў на пражыванне ў агульнай складанасці ў 24 спадарожных абʼектах, размешчаных уздоўж маршруту. Трэба зарэгістравацца і набыць спецыяльны «пашпарт вандроўніка» за пяць еўра – гэта дазволіць вам скарыстацца бясплатным пражываннем. Таксама трэба зрабіць ахвяраванне фонду ў любой суме.
Каб скарыстацца праграмаю, неабавязкова праходзіць увесь маршрут Санта-Барбары – яго можна пачаць яго на любым этапе. Нічога дзіўнага – мала каму з турыстаў удаецца яго завяршыць. З 2017 года – калі сцежка была адкрыта – яе цалкам прайшлі толькі 196 чалавек.
Першая частка праграмы, арганізаванай фондам, ужо завяршылася. У 2023 годзе на турыстычную сцежку выйшлі 1199 чалавек. Наступная частка гэтай праграмы пачнецца неўзабаве, пасля летняга сезону, 15 верасня. Праграма працягнецца да канца снежня. «Калі вам менш за 35 гадоў і вы хочаце адправіцца ў дзіўнае падарожжа, не выдаткоўваючы грошай, гэта прапанова для вас», – гаворыцца ў прапанове.
Сардзінія: што такое сцежка Санта-Барбары?
Шлях Санта-Барбары, размешчаны на Сардзініі (Італія), мае даўжыню 500 кіламетраў і складаецца з 30 этапаў, кожны з якіх складаецца прыблізна з 16 кіламетраў. Маршрут, які пачынаецца ў горадзе Іглесіяс на паўднёвым захадзе Сардзініі і праходзіць уздоўж прыгожых прыморскіх скал, праз лясы і дзюны, займае каля месяца. Турысты могуць убачыць, сярод іншага, руіны 150 закінутых шахт і захапляльны від на вадаспад Пісцына Іргас (Piscina Irgas).
У інтэрвʼю Маргарыта Конку, сакратар фонда Cammino Minerario di Santa Barbara, адзначыла, што адна з мэтаў праекту – прыцягнуць на Сардзінію моладзь. «Мы хацелі знізіць сярэдні ўзрост наведвальнікаў – ад пенсіянераў да людзей 20-30 гадоў. Таксама важна, каб людзі даведаліся пра гісторыю гэтай сцежкі», – падкрэсліла яна.
rp.pl/вх