Толькі за першую дэкаду красавіка 2025 года добраахвотнікамі пайшлі ў войска 993 чалавекі — амаль у два разы больш, чым за аналагічны перыяд студзеня, лютага і сакавіка, калі гэтая лічба вагалася каля 500 чалавек, паведамляе forsal.pl.
З пачатку года толькі Масква адправіла на фронт ва Украіне больш за 6400 чалавек.
Прыкметны рост цікавасці да кантрактнай службы адбыўся ў другой палове сакавіка. Аналітыкі звязваюць гэта з паведамленнямі аб вяртанні Расіяй горада Суджа і прылеглых тэрыторый у Курскай вобласці і інфармацыяй аб магчымых мірных перамовах паміж Расіяй і Украінай.
Пераломным момантам стала тэлефонная размова Уладзіміра Пуціна і Дональда Трампа 18 сакавіка — праз дзень колькасць навабранцаў дасягнула рэкордных 153 чалавек за суткі, і ў наступныя дні заставалася на вельмі высокім узроўні (напрыклад, 139 чалавек за суткі).
Грошы — моцны матыватар
Ранейшыя прагнозы аналітыкаў аб тым, што прыкметы заканчэння вайны могуць парадаксальным чынам павялічыць колькасць добраахвотнікаў, пацвярджаюцца. Многія маладыя расіяне не жадаюць згубіць шанец атрымаць рэкордную выплату па кантракце, а старэйшыя ставяцца да службы як да спосабу фінансавага забеспячэння сваёй сям'і — нават цаной жыцця. Варта адзначыць, што тыя грошы, якія цяпер прапануюцца, калі казаць па мясцовай пакупніцкай здольнасці, ніколі раней не былі даступныя сярэднестатыстычнаму грамадзяніну Расіі. Дадатковым фактарам можа быць нявызначанасць адносна таго, як доўга будуць дзейнічаць такія высокія бонусы — многія расіяне хочуць «злавіць» умовы кантракту да заканчэння вайны. Такія дзеянні, як напады Украіны на тэрыторыю Расіі і адпраўка беспілотнікаў у расійскія гарады, таксама, несумненна, стымулявалі расійскі патрыятызм.
Нягледзячы на відавочнае павышэнне цікавасці да рэкрутацыі ў армію, маскоўскія ўлады не збіраюцца зніжаць абароты — плануюць актывізаваць агітацыйныя мерапрыемствы на вуліцах горада. Па словах крыніц, яны спадзяюцца, што агрэсіўная кампанія заахвоціць яшчэ больш жыхароў падпісаць кантракт з войскам.
forsal.pl/вх