Беларуская Служба

Палякам патрэбны «сумленны» і «адказны» прэзідэнт – апытанне

20.03.2025 12:10
Даследчыкі пацікавіліся, якія рысы характару ў будучага прэзідэнта Польшчы найбольш пажаданыя.
Прэзідэнцкі палац у ВаршавеShutterstock/Kiev.Victor

Выданне Rzeczpospolita публікуе першае комплекснае даследаванне кандыдатаў у прэзідэнты, якое паказвае крытэры, якіх плануюць прытрымлівацца польскія выбаршчыкі. Даследаванне, якое правяла кампанія ARC Rynek i Opinia, раскрывае спіс рысаў, якія, на думку выбаршчыкаў, павінны характарызаваць прэзідэнта. Часцей за ўсё рэспандэнты называлі такія рысы будучага кіраўніка дзяржавы, як «сумленны» і «адказны».



«Можна падазраваць, што ў грамадстве існуе вялікі попыт на празрыстасць і дзейнасць, якая характарызуецца адказнасцю за дзяржаву. Гэта, магчыма, тое, чаго больш за ўсё не хапае выбаршчыкам «, — кажа кіраўнік даследчай групы  ARC Rynek i Opinia Гжэгаж Сыгноўскі.

У сваю чаргу, на думку Барталамея Махніка з Універсітэта кардынала Стэфана Вышыньскага ў Варшаве, гэтыя тэрміны на самой справе  азначаюць адно -  бяспеку. «Ейным (бяспекі - рэд.) увасабленнем, на думку рэспандэнтаў, павінны быць прадстаўнікі вышэйшай улады», — падкрэсліў Махнік, дадаўшы, што ў аспекце бліжэйшых выбараў рэспандэнтаў больш цікавяць рысы характару кандыдата, чым яго выбарчыя абяцанні.



Рэспандэнты таксама ацанілі пяцёрку кандыдатаў, якія карыстаюцца найбольшай падтрымкай у апытаннях - у каго з іх найбольш пажаданых рысаў.

Перамагае кандыдат  «Грамадзянскай кааліцыі» Рафал Тшаскоўскі. 63 працэнты рэспандэнтаў перакананыя, што ў катэгорыі  «адукацыя» найлепш падыходзіць прэзідэнт Варшавы.

Паводле палітолага прафесар Эвы Марціняк, хоць Шыман Галоўня таксама атрымлівае вельмі добрыя ацэнкі, але ў яго, у параўнанні з Тшаскоўскім, невялікі электарат.



У сваю чаргу, хоць Караль Наўроцкі – кандыдат, якога падтрымлівае найбуйнейшая апазіцыйная партыя  «Права і справядлівасць» - лічыцца і  «адукаваным» і  «патрыётам», то ягоная пазіцыя горшая ў параўнанні з Рафалам Тшаскоўскім.  Напрыклад, у катэгорыі  «патрыятызм», прэзідэнт Варшавы апярэджвае яго ажно на 12 працэнтаў.



Цікава, што нават у стэрэатыпна мужчынскай катэгорыі  «мужнасць» былы баксёр - Караль Наўроцкі, прайграе кандыдату ўльтраправай  «Канфедэрацыі» Славаміру Менцэну.

аз