У Польшчы тыя, хто балатуецца ў прэзідэнты, павінны сабраць 100 тысяч подпісаў.
11 чалавек ужо могуць быць упэўнены, што прымуць удзел у выбарах, у выпадку астатніх шасцярых подпісы правяраюцца.
Поўны спіс прозвішчаў кандыдатаў, якія выбаршчыкі ўбачаць на бюлетэнях для галасавання, стане вядомы праз некалькі дзён, паведаміў старшыня Нацыянальнай выбарчай камісіі Сільвестар Марціняк (Sylwester Marciniak).
— Я спадзяюся, што на працягу тыдня мы праверым усе подпісы. І або будзе прыняты пратакол аб рэгістрацыі, або адмова ў рэгістрацыі. Нам трэба праверыць 1 мільён 700 тысяч подпісаў. Правяраецца ці месца прапіскі і індывідуальны нумар PESEL супадаюць з дадзенымі Цэнтральнага рэестру выбаршчыкаў.
Прадстаўнікі найбуйнейшых палітычных фармацыяў, якія прысутнічаюць у Сeйме, могуць быць упэўнены, што прымуць удзел у выбарах.
Гэта Рафал Тшаскоўскі (Rafał Trzaskowski) ад «Грамадзянскай кааліцыі», Караль Наўроцкі (Karol Nawrocki) ад «Права і справядлівасць», Славамір Мэнцэн (Sławomir Mentzen) ад «Канфедэрацыі», Шымон Галоўня (Szymon Hołownia) - лідар цэнтрысцкага руху «Польшча 2050», Магдалена Беят (Magdalena Biejat) ад «Левых» і Адрыян Зандберг (Adrian Zandberg) ад левай партыі «Разам».
Нацыянальная выбарчая камісія таксама зарэгістравала Гжэгажа Браўна (Grzegorz Braun) ад групоўкі «Канфедэрацыя Кароны Польскай», Марэка Воха (Marek Woch) - гэта беспартыйны прадстаўнік мясцовага самакіравання, Яанну Сэнышын (Joanna Senyszyn) ад групоўкі «Дэмакратычныя левыя», Марэка Якубяка (Marek Jakubiak) ад партыі «Свабодныя рэспубліканцы» і беспартыйнага эканаміста Артура Барташэвіча (Artur Bartoszewicz).
Чакаюць рэгістрацыі: беспартыйны блогер і журналіст Кшыштаф Станоўскі (Krzysztof Stanowski), былы міністр фінансаў Давід Яцкевіч (Dawid Jackiewicz), Веслаў Лявіцкі (Wiesław Lewicki) ад партыі «Нармальная краіна», Рамуальд Стараселец (Romuald Starosielec) з «Руху выпраўлення Польшчы» і Мацей Мацяк (Maciej Maciak) ад «Руху за росквіт і мір».
Прэзідэнцкія выбары ў Польшчы пройдуць 18 мая.
IAR/яс