Olia Shnip BAND – гэта вынік музычнай рэзідэнцыі Дома Творцаў у Варшаве ў 2023 годзе. Музычная рэзідэнцыя летась сабрала каля 20 цікавых артыстаў, у выніку некаторыя з іх стварылі музычны калектыў.
Аўтары праекту OliA Shnip band – прафесійная спявачка Вольга Шніп і яе муж, былы палітвязень, саўндпрадзюсер і экс-музыка гурта Irdorath Антон Шніп.
«Яшчэ ў Беларусі я і мой муж стварылі праект, у якім абое і ўдзельнічалі. Калі муж сядзеў, мяне звольнілі з Тэатра оперы і балета, ведаеце, як у нас гэта адбываецца. У той перыяд я напісала шмат песень, па сваіх знаёмых, кансерваторскіх сябрах сабрала невялікі гурт – квартэт, зрабіла аркестровы пераклад музычных твораў. Калі муж выйшаў з турмы, мы пераехалі ў Польшчу. Атрымалася так, што ў Доме творцаў мы пазнаёміліся з музыкамі. Склад гурта – шэсць чалавек, гэта мульціінструменталісты, людзі, якія раней гралі хто ў аркестры, хто ў розных гуртах ад «Стрыкала» да джазавых калектываў. Разнастайны досвед кожнага з нас стварыў розную каларыстыку. Таму, па факту, як гурт мы арганізаваліся толькі цяпер», – расказвае Вольга Шніп.
Праграма канцэрта – гэта ўнікальнае спалучэнне моцнага харызматычнага вакала з рознажанравымі аранжыроўкамі ды лірыкай, натхнёнай «беларускім вопытам» апошніх год.
Гасцей чакае музычнае шоў з элементамі тэатральнага перформансу.
Канцэрт адбудзецца 18 студзеня а 19-й гадзіне па адрасе Варшава, ul. Puławska 114. Уваход вольны, данаты вітаюцца.
Цяпер ідзе набор на мастацкую рэзідэнцыю.
«Заяўкі прымаем да 20-га студзеня, таму трэба паспяшацца. Рэзідэнцыя пачнецца 22 лютага і будзе доўжыцца па 10 сакавіка. Галоўная мэта – падтрымка, рэабілітацыя творцаў. І інтэграцыя ў польскае грамадства. Менавіта ў гэтай рэзідэнцыі будзе шмат праграм, звязаных са знаёмствам з польскай культурай, установамі сферы культуры ў Польшчы. На сённяшні дзень маем каля сарака заявак», – расказвае арганізатар Дома Творцаў Сяргей Доўгушаў.
Падацца на творчую праграму падтрымкі могуць і мастакі, якія знаходзяцца ў Беларусі, арганізатары абяцаюць выконваць усе ўмовы, што датычна бяспекі.
«Дом Творцаў» – ініцыятыва якая дапамагае рэпрэсаваным беларускім музыкам, мастакам. Месца рэзідэнцыі знаходзіцца ў Варшаве. За 2 гады існавання арганізатары правялі шэсць рэзідэнцый у якіх паўдзельнічалі больш за 150 таленавітых творцаў з Беларусі.
вх