Многія беларускія кніжкі можна прачытаць не шукаючы іх ні ў кнігарнях, ні ў бібліятэках, проста дома. Дастаткова зайсці на сайт kamunikat.org. Гэта Беларуская інтэрнэт-бібліятэка, якая напаўняецца зместам ужо 23 гады. Гэта найбуйнейшая беларуская анлайн бібліятэка ў свеце. На сайце змешчана больш за 55 тысяч розных беларускіх публікацый – гэта кнігі, аўдыёкнігі, газеты, часопісы, відэа, радыё і тэлеперадачы, і нават крыху музыкі. Спектр тэм вельмі шырокі: гэта мастацкая літаратура, праваабарончыя, паліталагічныя, мовазнаўчыя, гістарычныя тэксты, энцыклапедыі, кнігі па рэлігіі, сотні перыядычных выданняў, якія выходзілі ў самой Беларусі і ў замежжы, ці выдаваліся беларускай нацыянальнай меншасцю ў Польшчы і ў Літве. Вось нядаўна сайт «Камуніката» абнавіўся і стаў яшчэ больш зручны для карыстання. Пра сам праект «Камунікат» і пра яго новую старонку нам распавёў заснавальнік Яраслаў Іванюк.
Яраслаў Іванюк з кнігамі. Нядаўна «Камунікат» стаў таксама друкаваць кнігі.
Глебу, на якой нарадзіўся Kamunikat.org, дала Беларуская служба Польскага радыё. Яраслаў Іванюк, журналіст нашай службы, быў адказны за сувязі са слухачамі і перыядычна рыхтаваў бюлетэнь з лістамі слухачоў і адказамі на іх пытанні. Надрукаваны бюлетэнь, які і называўся «Камунікат», высылаўся ў Беларусь. У 2000 годзе Яраслаў вырашыў, што варта гэты бюлетэнь паставіць у інтэрнэт.
Сайт задаволіць і аматараў мастацкай літаратуры, і навуковых даследчыкаў.
Новая пошукавая сістэма дазваляе наведвальніку лёгка знайсці тое, што яму патрэбнае.
«Камунікат» разам з акторамі Купалаўскага тэатру (Свабоднымі купалаўцамі) агучвае беларускія кнігі: Святланы Алексіевіч, Ларысы Геніюш, Уладзіміра Арлова, Андрэя Федарэнкі, Барыса Пятровіча, Алеся Аркуша, Артура Клінава, Валеры Гапеева і іншых сучасных беларускіх аўтараў.
«Камунікат» дае бясплатны доступ да ўсіх сваіх рэсурсаў.
Рэсурс сайта «Камунікат» настолькі багаты, што ён выклікае асацыяцыі з нацыянальным архівам беларускага пісьменства. Тое, чым займаецца «Камунікат», на самой справе павінна выконваць нейкая дзяржаўная беларуская ўстанова.
Яраслаў Іванюк адзначае, што калі толькі з'явіцца вольная Беларусь, то ён з задавальненнем перадасць тое, што яму і яго камандзе ўдалося накапіць цягам гадоў, незалежнай беларускай дзяржаўнай установе.
«Камунікат» працуе на аснове спонсарскіх ахвяраванняў.
Фінансавую падтрымку аказваюць, між іншым, Амбасада Нідэрландаў і Маршалкоўскай управы Падляшскага ваяводстваў.
Каманда «Камуніката» імкнецца сабраць у адным месцы ўсё, што выдадзена па-беларуску альбо пра Беларусь на іншых мовах. Вядома, што адлічбаваць усё яшчэ не паспелі. На сайце створаны каталогі экзэмпляраў, якія фактычна знаходзяцца на паліцах Беларускага гістарычнага таварыства ў Беластоку (каталог БГТ), на паліцах Усходнееўрапейскага дэмакратычнага цэнтра ў Варшаве (Каталог EEDC), у Беларускім музеі ў Гайнаўцы (MiOKB) і ў прыватным архіве Яраслава дома.
Рэсурс «Камуніката» пастаянна пашыраецца, каб мець актуальную інфармацыю варта падпісацца на ютуб-канал, і сацсеткі «Камуніката».
Яланта Смялоўская