У Дзень расійскага народнага адзінства была зацверджаная праграма інтэграцыі Беларусі і Расіі, якая рыхтавалася тры гады. Фактычна гэта пачатак паўзучага захопу Масквой суседняй краіны.
Гэтая гістарычная, доўгачаканая падзея мела своеасаблівую абстаноўку. Зацвярджэнне адбылося падчас пасяджэння так званага Вярхоўнага Савета Саюзнай дзяржавы Беларусі і Расіі, якое праходзіла ў выглядзе банальнай рабочай відэаканферэнцыі. Вядучыя палітыкі Расіі і Беларусі афіцыйна зацвердзілі 28 так званых інтэграцыйных праграм, якія прадугледжваюць уніфікацыю прававога, сацыяльнага і эканамічнага парадку абедзвюх краін, а таксама агульную абарончую дактрыну.
Праграмы, якія раней называліся «дарожнымі картамі інтэграцыі», прадугледжваюць, сярод іншага, уніфікацыю фінансавых сістэм, стварэнне адзінага падатковага рэжыму, каардынацыю сацыяльнай палітыкі, у тым ліку пенсій і заробкаў, роўны доступ да дзяржаўных закупак і адзіную сельскагаспадарчую палітыка.
Беларусь і Расія таксама павінны стварыць адзіны рынак газу і нафты і агульную транспартную прастору.
Як гэтыя вялізныя планы будуць рэалізаваны на практыцы, пакуль невядома. Чакаецца, што рэалізацыя зацверджанага ў чацвер працягнецца да 2027 года. Як паведаміў прэм'ер-міністр Расіі Міхаіл Мішусцін, для рэалізацыі «праграм» неабходна падрыхтаваць і прыняць не менш за 400 новых прававых актаў.
Перад камерамі інтэграцыйныя дакументы падпісваў, як акт капітуляцыі, толькі Лукашэнка. Ён абмовіўся: «Я падпісваю, але мы ўсе адкажам».
А ў канцы сустрэчы Лукашэнка паскардзіўся, што Пуцін паабяцаў запрасіць яго ў Крым, «дзе ў нас актывы ды іншыя праблемы», але не стрымаў свайго слова. Мінск, нягледзячы на ціск Масквы, да гэтага часу фармальна не прызнаў анексіраваны паўвостраў часткай Расіі.
юл